[A:480]sogs mdor na chos 'chad nyan gyi thugs brel yod pa'i skabs ma gtogs/ rgyun par snga dro nas nyi ma phyed ma zin tsam gyi bar du thugs dam kho na dang / de nas skabs su bab pa'i thugs brel rnams bcad cing / slar yang dgongs mo'i dus rtsa brgyud kyi bla ma'i sku bstod dang / brgyud pa'i gsol 'debs kha shas gsung bzhin pa'i sgo nas sku 'chags kyi zhabs skor ci rigs par mdzad cing / de nas sa srib tsam nas bzung ste mtshan phyed ma zin tsam gyis bar du thugs dam kho na la gzhol ba sogs mdor na brtson 'grus drag pos nyin mtshan khor yug kun tu mnyam par bzhag pa'i rnal 'byor dang / mnyam par ma bzhag pa'i rnal 'byor rnams ltag sprad de nyams su bzhes pa la brten nas tha mal gyi rnam par rtog pas skad cig kyang brdzi bar mi nus pa yin no/ /de ltar sdom pa gsum la gces spras su mdzad cing nyams su bzhes pa'i stobs kyis spangs pa dang rtogs pa'i yon tan bsam gyis mi khyab pa thugs rgyud la 'khrungs par gor ma chag na'ang / bdag cag gi dpal ldan bla ma dam pa 'dis ni rang gi yon tan thams cad bum nang gi mar me bzhin du sbas te ci'ang mi mkhyen pa'i tshul kho na mdzad cing / de'ang chos dang 'jig rten gyi bya ba che phra thams cad la mkhyen rab kyi klong shin tu che bar snang mod/ tha na 'jig rten gyi bya ba phra mo tshun chad la nged kyis ci'ang mi shes kho na gsung zhing / dag pa'i gzigs snang dang / nyams rtogs la sogs pa ji 'dra 'khrungs zhes bka' 'dri zhus na'ang / nga lta bu la nyams rtogs ga la 'ong kho na gsung pa dang / bdag cag bu slob rnams kyis bsod nams kyi tshogs rdzogs pa'i slad du rje nyid kyi rnam thar zhig bri rgyu yin tshul zhus pa'i tshe'ang / nga lta bu'i bla ma'i rnam thar 'bri nyan ga la yod kho na gsung pa sogs mdor na sngon gyi bka' gdams pa'i dge ba'i