[A:479]yin pa la the tshom cung zad kyang mi mnga' ba'i thugs dad bsam gyis mi khyab pa'i sgo nas zhal bzhugs pa'i dus su'ang lus ngag yid gsum longs spyod dang bcas pas mnyes par bya ba kho na las/ mi mnyes pa skad cig kyang mi mdzad cing / zhi bar gshegs nas kyang gong du bshad pa ltar dus dran gyi mchod pa sogs ma chags par mdzad cing rgyun du'ang gsol 'debs nar mar mdzad pa dang / thugs dam mnyams bzhes kyi rim pa'ang / gong du bshad pa ltar gyi yi dam lha'i ljags bsnyen rnams mdzad pa dang / dus rgyun du'ang lta ba 'khor 'das dbyer med kyi rtsi dang ma bral ba'i sgo nas/ lam zab mo bla ma'i rnal 'byor dang / dpal kye rdo rje phyi nang sbrags ma'i mngon rtogs lam dus kyi dbang blang ba dang bcas pa shin tu rgyas pa dang / rnal 'byor dbang phyug gi srung ba dang / nA ro mkha' spyod ma ste sa skya pa'i chag med bzhir grags pa rnams dang / 'jam dbyangs dkar po dang / 'byung po 'dul byed dang / mgon dkar yid bzhin nor bu dang / rdo rje brag rdzong ma rnams kyi mngon rtogs bzlas pa dang bcas pa dang / spyan ras gzigs kyi bdag bskyed sngon du 'gro ba'i dzaM ser nag gi chu sbyin dang / gtor ma brgya rtsa dang / dbyu gu drug cu rtsa bzhi dang / yi dwags la chu sbyin dang bcas pa rnams dang / gtor bsngo'i rim pa'ang kye rdo rje dang / mkha' spyod ma dang / 'byung po 'dul byed dang / mgon dkar dang / gur zhal gnyis dang / dur bdag dang / las mgon dang / stag zhon dang / dmag zor ma dang / bektse dang / mkha' 'gro spyi ste de rnams la gtor 'bul gyi cho ga shin tu rgyas pa dang bcas pa rnams ma chag par mdzad cing / skabs skabs su de'i steng du yi dam gyi lha 'ga' zhig gi bdag bskyed gsung ba