[A:484]brten nas sdig pa gsog pa de lta bu'i rigs gtan nas mi mdzad pa thams cad la mngon sum tshad mas grub pa dang / lhag par yon tan gyis khyad par du byas pa'i sde snod 'dzin pa dang / rgyud sde 'dzin pa rnams la zhe sa dang bkur sti phun sum tshogs pa'i sgo nas gzengs bstod cing / de dag gi yon tan sgrogs pa dang / rang nyid spangs pa dang rtogs pa'i yon tan bsam gyis mi khyab pa la dbang 'byor zhing che rgu thams cad kyi gtsug gi nor bus zhabs kyi padmo la btud par gyur na'ang khengs pa dang dregs pa lta ci/ dman pa'i brtul bzhugs kho na 'dzin pa yin te zhal nas kyang / nga la spangs rtogs kyi yon tan ci'ang med mod/ sngon las kyis e wa~M pa'i mkhan po sogs byed dgos byung ba yin gsung ba sogs mdor na rnam par thar pa phyogs gang nas gzhig kyang skyon gyi rnam pa cung zad kyang mi mnga'/ rgyu mtshan de'i phyir na sku mthong ba dang / gsung thos pa dang / mtshan tsam yid la dran pa tshun chad kyang phan pa dang bde ba 'ba' zhig la sbyor bar mdzad pa'i 'brel tshad don ldan chen por bzhugs shing / sangs rgyas dngos 'jig rten du byon pa dang khyad par ci'ang med cing / gdul bya rnams la sangs rgyas kyi mdzad pa mtha' dag kyang mdzad pa'i phyir/ bka' drin gyi ngos nas sangs rgyas las kyang ches cher lhag par gyur pa yin no/ /lung dang rtogs pas rab bsdus pa'i/ /bstan pa'i rtsa ba so thar te/ /yon tan rin chen thams cad kyi/ /'byung gnas rin chen 'byung gnas bzhin/ /de slad bag yod ra ba yis/ /yongs bskor tshul khrims khang bzang ni/ /dus kun nyes spyod chom po dang / /bral ba'i sdom pa lha yul bzhin/ /bzod nas byang chub spyod mchog la/ /mdza' ba'i skud pa dkar po yis/ /rtag tu btsems pa'i byang chub sems/ /gzhar yang med pa nyid mi 'gyur/ /khyod kyis