[A:486]chu 'dzin gyis bsgribs kyang / /'od kyis 'jigs rten gsal bzhin mdzes/ /de slad gang gi yon tan ni/ /rgya mtsho bas kyang shin tu zab/ /ri rab mchog las rnam par mtho/ /lha yul las kyang ngo mtshar che/ /khyod kyi rnam thar thub dbang ltar/ skyon bral yon tan ldan mthong nas/ /bsam bzhin dad pa'i padmo ni/ /nyin bzhin rgyas pa kho nar gyur// //spyi don bdun pa mthar gdul bya rtag 'dzin can dang le lo can rnams chos la bskul ba'i slad du gzugs sku'i bkod pa chos kyi dbyings su bsdus kyang sems can gyi don rgyun mi 'chad pa'i tshul ni/ bdag cag gi dpal ldan bla ma dam pa bka' drin 'khor mtha' dang bral ba 'dis ni dgung grangs don drug tu ma phebs kyi bar la bstan pa dang sems can gyi don rgya chen po mdzad de/ sras kyi thu bo rnams ni yon tan bsam gyis mi khyab pa'i phung por byin gyis brlabs te mtha' yas pa'i sems can thams cad srid pa'i rgya mtsho chen po las sgrol ba'i 'dren pa dam par mnga' gsol/ 'ga' zhig ni ma 'ongs pa na 'gro ba 'dren pa'i nus pa dang ldan par mdzad/ gzhan yang sku mthong ba dang / gsung thos pa dang / mtshan tsam yid la byed pa dang / sku'i grib ma phog pa tshun chad kyi sems can thams cad kyang phan pa dang bde ba 'ba' zhig la 'god par mdzad pa sogs sku dngos kyis gdul bar 'os pa rnams ni legs par btul/ da ni bdag cag skal dman rnams kyi bsod nams kyi bgo skal re zhig de tsam du zad pa dang / sku'i bkod pa gzhan gyis sems can gyi don rgya chen po mdzad pa'i dus la bab par gzigs nas yongs su mya ngan las 'da' ba'i tshul ston par bzhed de/ de'ang sngar dgung grangs lnga bcu dang drug cu'i nang du phebs pa'i skabs rnams su rje'i zhal nas/ lo bdun cu don grangs tsam thub na mi tshe