[A:489]bya gtol med du gyur te gtsug lag khang du 'dus tshogs kyis zhabs brtan tshe chog dang / gzhan yang bdud zlog dang brgya bzhi sogs mang du bgyis pa dang / sman pa so so nas kyang gsol sman sgo gang zab nas phul bas zhag drug bdun tsam nas phran bu'i sku khams je dwangs su gyur mod/ 'on kyang snyun gzhi gsing dwangs zhig ni gtan nas 'ong rgyu mi snang bas/ res snyun gzhi cher med kyang gsol chas la dwang ga med pa dang / res mkhal grang gi rnam pa lta bu dang / res zhabs 'bam gyi rnam pa lta bu sogs res 'jog tu snang zhing / gzhan yang de skabs rnams su dgon pa'i nye skor du wa brgyal ba dang / spyang ki rgyugs pa dang / phyogs gzhan du khang pa yang bsgyel skad kyi dus ma yin pa'i rlung chen po ldang ba sogs dang / khyad par mkhan chen rdo rje 'chang byams pa kun dga' bstan 'dzin zhi bar gshegs pa nas bzung / lam 'bras lha khang du bzhugs pa'i ngor chen rdo rje 'chang gi 'dra sku rin po che'i zhal mdangs dus rgyun lta bu cung 'ong rgyu mi snang zhes thams cad kyis zer la/ lhag par 'di lo hor zla brgyad pa dang dgu pa'i nang ngor chen gyi 'dra sku rin po cher spyan chab bsil ba'i rjes lta bu dod pa dang / gzhan yang khams bod kun tu dus kyi 'khrugs rtsod mi bzad pa langs pa sogs mi dge ba'i ltas mang du byung zhing / de ni 'jig rten gyi phan pa dang bde ba thams cad ni gang zag dam pa 'di dang 'di lta bu'i bsod nams kyi mthu las byung ba yin la/ de nyid gzhan du bzhud par dgongs pa na 'di lta bu'i snga ltas 'byung ba chos nyid yin te byang chub sems dpa'i skyes rabs dang / sngon gyi gang zag dam pa rnams kyi rtogs pa brjod pa rnams su'ang de ltar byung ba'i tshul mang du bshad pa'i phyir ro/ /de nas bdag gis zhabs brtan 'dra bsgrubs na zhus kyang /