[A:496]zhugs pa zhig rmis/ gnyid sad nas kyang dga' skyo zung du 'brel ba'i sgo nas mig nas mchi ma mang po shor ces gsungs pa dang / tshes bcu bzhi'i snga dro skya rengs shar ba tsam na nam mkha' mthing shun ltar sngo zhing shin tu dwangs pa la/ dgon pa'i thad ngos nas nub phyogs su sprin dkar po dar yug brkyangs pa lta bu gnyis 'dug ces gleng ba dang / de nas nyin phyed tsam na 'ja' kha dog lnga ldan ring thung gsum shar 'dug ces thams cad kyis gleng bas da thugs dam las grol bar gdon mi za snyam nas sku gdung rin po che'i drung du phyin pas bdag dang lhan cig 'ong ba lta bu'i sbrang bu zhig kyang sku gdung rin po cher 'khor 'dug pa dang / zhal mdangs phran bu nyams pa ltar snang bas/ slar yang 'od gsal las zung 'jug gi skur bzhengs te/ sangs rgyas dang byang chub sems dpa' rnams dang lhan cig dpa' bo dang mkha' 'gro ma dang chos skyong ba'i srung ma'i tshogs dang bcas pa rnams kyi bsu ba'i bkod pa so so skye bo'i blo'i spyod yul las 'das pa dang bcas te dag pa'i zhing khams bde ba can la sogs par gshegs par gor ma chag go /de nas na bza' dang sku gzugs rnams la bltas pas de'i sngon bdag cag rnams kyis ma mthong ba ma gtogs/ shangs bug nas byang sems dkar po mang po mgul gong nang du babs snang ba thams cad kyang bskams zin 'dug /'di ni ngor chen rdo rje 'chang gi rnam thar sogs nas 'chi kha nyid du phyag rgya chen po mchog gi dngos grub thob nas rnam shes spyi gtsug tu song ste/ longs spyod rdzogs pa'i sku'i zhing khams su 'gro bar 'gyur ro/ /de'i rtags pha'i khu ba'i thig le sna bug g.yon nas mar 'byung ngo / /zhes bde mchog gi gzhung nas lung 'dren dang bcas te gsungs 'dug pa dang / gsang ba'i gnas kyang sba ba sbubs su nub te gtan nas mi snang /