[A:511]mdzes par spud pa bcas kyang zla ba gsum gyi khongs su shin tu sgros gtsang bar bzhengs grub pa la yungs 'bru lta bu'i ring bsrel dang / sku 'dra li ma dang / byin rten khyad par du 'phags pa 'ga' zhig dang / srog shing mtshan nyid dang ldan pa dang / bla ma brgyud pa'i mtshan nyid 'bum nas bzung ste bkra shis kyi bar rgyud sde bzhi dang 'brel ba'i gzungs bsam las 'das pa dang / sku gdung yid bzhin nor bu'i cha shas las grub pa'i sku 'dra rnams kyis phyur bur bkang ste/ tshul bzhin du bsgrubs pa'i nor lha'i gter bum dang / gnod sbyin 'khor los zhabs bsdams pa'i bar rje btsun gong ma'i phyag len ji lta ba bzhin bgyis pa yin no/ /de dag gi tshe bzo bo thams cad la'ang 'dzugs ston dang / bar ston dang / gser ston dang / grol ston sogs shin tu zab pa dang / rgyun gyi bza' btung phun sum tshogs pa dang / yon dang gnang sbyin la sogs pas shin tu yid tshim par bgyis so/ /de dag gi skabs su'ang bar chad kyi rnam pa cung zad tsam yang med cing / mthun rkyen rnams kyang 'bad rtsol cher mi dgos par shugs kyis 'grig pa sogs mdor na tshegs chung ngus bde blag tu grub pa ni rje nyid kyi thugs rje kho na yin par gdon mi za'o/ /gzhan yang zhi bar gshegs pa nas bzung / deng sang gi bar phal che bar zla re bzhin dus chen dang bstun te dge slong kha shas kyis bla ma mchod pa ma chag par bgyis pa dang / khyad par bshad ma thag pa'i dus thang dang / 'dra sku dang / dngul gdung rnams la thog mar bdag cag dge slong bcus tshe dpag tu med pa la brten pa'i rab tu gnas pa nyin gang ma zhig bgyis pa dang / de rjes shing glang sa ga zla ba'i tshes gcig nas bzung / bdag cag dge slong bcu gcig gis dpal kye rdo rje'i rdul tshon gyi dkyil 'khor bzhengs te sgrub mchod dang 'brel bar bzang po drug ldan gyi rab tu gnas pa shin tu rgyas pa nyin bdun pa