[A:361]mkhan chen rdo rje 'chang chen po de nyid kyi dgongs pa rdzogs pa'i slad du dbus gtsang dag pa'i zhing du bsnyen bkur rgya cher bstabs pa dang nyan bshad sgom gsum ji ltar mdzad pa'i tshul lo/ /de'i dang po ni/ 'jig rten na blang dor gyi gnas phyin ci ma log par rtogs par byed pa'i thabs ni/ dge ba'i bshes gnyen la brten te thos pa byed pa nyid yin la/ gang dag thos bsam gyi rgyu sngon du ma song bar bsam gtan la mnyam par bzhag pa tsam gyis ni thar pa dang thams cad mkhyen pa'i go 'phang thob par ma gsungs te/ 'phags pa dkon mchog brtsegs pa las/ gang dge ba'i bshes gnyen la brten par byed pa de ni thos par 'gyur ro/ /thos nas rab tu shes so/ /shes nas nan tan byed do/ /zhes dang / ji ltar mun pas khyab bsgribs pa/ /khyim du zhugs par gyur na ni/ yod par gyur pa'i gzugs rnams kyang / /mig gis mthong bar mi 'gyur ro/ /de bzhin du ni 'di la yang / /la la'i mig dag skyes gyur kyang / /dge ba dang ni sdig pa'i chos/ /ma thos par ni shes mi 'gyur/ /zhes sogs dang / gang dag byang chub sems dpa'i sde snod kyi chos kyi rnam grangs 'di ma thos/ 'phags pa'i chos 'dul ba ma thos par ting nge 'dzin tsam gyis dga' ba rnyed pas nga rgyal gyi dbang gis che ba'i nga rgyal du lhung ba de dag ni skye ba dang rga ba sogs nas/ sdug bsngal gyi phung po las yongs su mi thar te/ zhes sogs kyi bar du gsungs pa'i phyir ro/ /de bas na rgyal ba'i bstan pa la zhugs pa rnams kyi mngon par rtogs pa ni thos bsam sgom gsum rim pa can du nyams su len pa nyid yin no zhes gdul bya rnams la gdams pa'i slad du rang nyid kyang de'i rjes su slob par bzhed de/ de'ang dge tshul gyi sdom pa gsan ma thag pa nas bzung ste/ gcen byams pa kun dga' bstan 'dzin gyi zhabs pad bsten te thar rtse