[A:517]bkod zin to// //slar smras pa/ ngo mtshar mkhyen brtse nus pa'i chu klung ji snyed gcig tu 'khyil ba las/ /ngo mtshar bshad sgrub dpag bsam ljon pa sngon med gsar du skyed bsrings pas/ /ngo mtshar phan bde'i 'dod rgu sbyin la tsintA ma Nis mtshon min pa/ /ngo mtshar mi zad du ma'i gter gyur dpal ldan bla mar phyag bgyi'o/ /gang gi rnam thar yon tan rin chen gter/ /yid 'phrog don gyi ltad mo 'bum 'byin pa/ /de kun tshig gi srad bur brgyu ba la/ /rgyal ba rnams kyang ngal ba'i rnam pa 'dzin/ /'on kyang bdag blo'i khab kyi bu ga ru/ /chud pa'i rtogs brjod phra rab rdul lta bu/ /'di gtan phongs pa'i gdung ba sel ba gang / /sdeb legs tshig gi rgyal mtshan rtse la bkod/ /'di na gang mtshan rna bar lhung ba yang / /skye ba brgya phrag mang por rnyed dka' na/ /rnam thar dran bzhin gsol ba btab pa'i mod/ /rnam grol 'dod rgu sbyin la som nyi ci/ /de slad 'khor bas byas pa'i dpal 'byor rnams/ /skad cig mi gnas klog gi thag pa ltar/ /mthong na zhi ba'i nags klung bsten byed pa'i/ /thar 'dod dad pa'i gsos su 'di longs shig /'dir 'bad dge tshogs spos kyi glang po yis/ /ma rungs 'khor ba'i g.yul ngo rab bcom nas/ /drin gyis lci ba'i yid can kun khyer te/ /byang chub snying po'i grong du 'jug gyur cig /dpal ldan bla ma dam pa gsum gyi rtogs pa brjod pa ngo mtshar me tog g.yo ba'i 'khri shing byin rlabs 'dod rgu'i 'byung gnas las/ mkhan chen rdo rje 'chang rnal 'byor 'jam dpal bzang po bkra shis grags pa'i rgyal mtshan dpal bzang po'i zhal snga nas kyi rtogs pa brjaud pa'i yal 'dab ste gsum pa'o//