[A:402]rin po che grags pa rgyal mtshan gyis bsgrigs pa'i lam 'bras glegs bam pod ser mar grags pa dang / ngor chen rdo rje 'chang chen pos bsgrigs pa'i gsung ngag glegs bam pod dmar du grags pa rnams kyi lung bcas legs par gsan cing tshig don rnams kyang bsams byung gi shes rab zab mos mngon sum du mdzad pa yin no/ /gzhan yang de skabs kyi lo snga phyi kun tu don gnyer so so'i mos pa dang bstun pa'i zab pa dang rgya che ba'i chos kyi 'khor lo ci rigs par bskor te/ gdul bya chos la ma dad pa rnams dad pa dang / dad pa rnams kyi rgyud smin cing grol bar mdzad de/ mdor na bshad sgrub kyis bsdus pa'i bstan pa rin po che nyi 'od kyis phyes pa'i padmo bzhin du rgyas par mdzad pa yin no/ /gang du son pa tsam gyis kyang / /srid pa'i 'jigs pa zil gnon pa'i/ /dpal ldan sa skya zhes grags pa/ /dad pa'i spyan gyis legs par mjal/ /de na brtan pa'i 'khor lo nyid/ /mi yi rnam par shar rnams las/ /dam pa'i chos kyi sman chen po/ /'khor ba'i rims nad zhi phyir blangs/ /khyad par mi zad chos kyi gter/ /dbang bsgyur nam mkha'i mtshan can las/ /zab rgyas chos kyi zil dngar rgyun/ /len phyir rab tu chas pa na/ /bstan srung rnams kyang spro dga' yi/ /chu yis lan brgyar bkrus pa bzhin/ /'dzum dkar khongs nas dgod bzhin du/ /bsu ba'i bkod pa bshams la brel/ /de nas mang du thos pa la/ /gzhar yang ngoms pa med pa 'dis/ /shin tu bgrod dka'i lam rnams kyang / /bdud rtsi bzhin du dga' bas bsten/ /nam zhig smra ba'i dbang phyug de'i/ /mtshan dpe'i dkyil 'khor mjal ba dang / /lhan cig shes rab rgyas pa'i ltas/ /mngon sum bzhin du 'ongs par gyur/ /ma bslabs pa la kun mkhyen