[A:403]du/ /'gyur ba mi srid ces bden nam/ /gzhan du rgyal kun 'dus pa'i zhal/ /gzigs pas mkhyen rab rgyas 'di ci/ /lha sras gtsug gi rigs bdag tu/ /sa skyong lung gis mnga' gsol te/ /rdo rje'i sngags kyi cho ga yis/ /mngon 'dod re ba'i shing rta bkang / /las kyi 'byung 'gyur mkhyen pa ni/ /tshems dkar 'od kyis 'grems pa bzhin/ /'gro ba'i blo mun kun bsal bas/ /mkhas dang rmongs pa'i khyad par bye/ /zab gsang sngags kyi smin grol dang / /tha snyad sgra yi bstan bcos sogs/ /rnam dpyod blo yi bang mdzod du/ /bcug pas shes rab nor gyis phyug /mos pa'i rdzing bu dang 'tshams par/ /chos kyi zla snang 'bum spros pas/ /'khor ba'i rab rib kun bsal te/ /rnam grol ku mud rgyas par mdzad// //gsum pa mkhan chen rdo rje 'chang chen po de nyid kyi dgongs pa rdzogs pa'i slad du dbus gtsang dag pa'i zhing du bsnyen bkur rgya cher bstabs pa dang nyan bshad sgom gsum ji ltar mdzad pa'i tshul ni 'di ltar rjes su thos te/ rje 'di dgung grangs so gcig pa sa yos hor zla bcu gcig pa'i nang khu bo mkhan chen rdo rje 'chang chen po de nyid dbon po stod du bad kan skya rbab kyis bsnyun tshul bzhes shing / slar hor zla bcu gnyis pa'i nang cung zad sku khams dwangs tshul bstan nas lhun grub steng du phebs/ sku rim sman dpyad sogs la thugs 'dun mi mdzad par 'dug na'ang rje 'dis gong du khu bo mkhan chen de nyid kyi rnam thar du gsal ba ltar gyi zhabs brtan gyi rigs shin tu rgya che bar bsgrubs/ gzhan yang de skabs su rje 'dis drug 'du'i dbu bzhugs rnams kyang mdzad/ slar yang rim gyis sku khams je nyog tu song zhing yun ring mi bzhugs par zhal gyis bzhes par brten/ rje 'di'i