[A:351]pa'i lugs kyis mo bya'i lor yum la gnod pa med cing bde ba dang / 'byor pa dang / lo legs pa la sogs pa byang chub sems dpa'i rnam par thar pa dang mthun par bltams so/ /de ltar bltams pa'i khye'u de ni gzugs bzang zhing lta bas chog mi shes pa/ skyes bu chen po'i mtshan dang ldan pa zhig ste/ yab yum rnams kyis mtshan padma phrin las zhes bya bar gsol to/ /de nas na tshod dang mthun pa'i kha zas kyi khyad par bzang ngo cog gis rdzing bu'i nang gi padmo bzhin du rim gyis bskyed bsrings te cung zad mno shes pa na'ang / gzhon nu de ni sngon gyi rgyal ba rnams la lhag par bya ba byas shing dge ba'i rtsa ba bskyed pa'i stobs kyis rigs kyi yon tan khyad par can sad de/ yab yum dang rgan pa rnams la gus shing / dman pa rnams la rjes su brtse ba dang / bzhin 'dzum pa dang / gsong por smra ba dang / khro ba mi mnga' ba dang / gtsang sbra che ba la sogs pa 'gro ba rnams kyi yid kyi brtan pa cig car du 'phrog par nus pa zhig yod ces thos la/ khyad par du'ang khyim na gnas pa ni dug can gyi zas bzhin du sdug bsngal thams cad kyi 'byung gnas su gzigs te/ rab tu byung ba la skom pa chu 'dod pa lta bu'i sgo nas zhal nas kyang / nga btsun pa byed pa yin kho na gsungs shing / dgun grang ba'i skabs su'ang yab yum rnams kyis pags pa'i na bza' zhig bzo bar mdzad kyang / de la thugs skrag pa'i snang bas gtan nas mi bzhes pa dang / des mtshon pa'i rgyun gyi na bza' rnams kyang dmar po 'ba' zhig las dkar po dang khra bo'i rigs mi gsol ba dang / gzhan yang tha mal pa'i rtsed mo dang 'du 'dzi'i rigs la mi dgyes shing / de'i stobs kyis byis pa gzhan dang lhan cig byon pa'i tshe'ang / thog mar rtse mo'i rnam pa cung zad re mdzad nas/ slar rang nyid su'ang med pa'i sa phyogs dben pa dag tu