[A:350]mchog dang mchog ma yin pa'i sprul pa bsam gyis mi khyab pa'i sgo nas sems can gyi don mdzad pa las/ 'dir skabs su bab pa bdag cag skal ba dman pa rnams kyi don du so so skye bo'i rdo rje slob dpon gyi rnam par rol par bzhed de/ de'ang 'di'i 'khrungs pa'i yul ni/ byang chub kyi snying po 'phags yul rdo rje gdan las byang phyogs su dpag tshad brgya bgrod pa'i gnas/ gtsang la stod gram pa dpal ldan sa skya zhes yongs su grags pa dang ha cang mi ring ba'i yul/ yon tan rin po che du ma'i 'byung gnas dpal e waM chos ldan dang khad nye ba'i sa'i thig le rtse na rgya mtsho gling zhes par/ yab mkhan chen nam mkha' bsam 'grub kyi rus dbon padma don grub ces bya ba bya ba dang bya ba ma yin pa'i blang dor la mkhas pa/ pho rtsal sna dgu la sogs pa'i stobs kyi pha rol tu son zhing / rigs gzugs longs spyod kyis mngon par sgeg pa de dang / yum kha na ma tho ba med pa'i rigs su 'khrungs shing ngo tsha dang khrel yod kyis brgyan pa/ dad pa dang snying rje dang gtong ba la sogs pa ya rabs kyi yon tan mang pos mdzes pa padma bu khrid ces bya ba ste/ yab yum de gnyis la sras drug tsam yod pa las/ phu bo gnyis kyi 'og mar gyur pa de ni bdag cag gi dpal ldan bla ma dam pa yon tan ma lus pa'i gter mdzod du gyur pa 'di nyid yin te/ de'ang yum gyi lhums su zhugs pa'i dus su yab yum la rmi ltas bzang ba la sogs pa ngo mtshar ba'i ltas mang du byung zhing / de nas ji srid phyir ma btsas kyi bar du'ang yum gyi lus yang zhing zo mdog bde ba dang / rang bzhin gyis dge ba la spro zhing ting nge 'dzin ngang gis skye ba la sogs pa dge mtshan mtha' dag mngon du gyur bzhin pa'i ngang nas/ rab byung bcu gsum pa'i nang gses legs sbyar gyi skad du sa mya zhes pa zhi ba ste rgya rtsis