[A:424]gyi de bzhin gshegs pa thams cad kyi bgrod pa gcig pa'i lam gsung ngag rin po che lam 'bras bu dang bcas pa'i chos kyi 'khor lo bskor ba'i dbu btsugs pa nas bzung ste/ dgung grangs nga bzhir son pa chu stag lo'i bar mkhan po lo bdun mdzad/ lo re bzhin dgun gyi dus stod smad bar gsum nas 'dus pa'i don du gnyer ba mang dus nyis brgya lhag tsam dang / nyung dus phyed nyis brgya bskor la gsung ngag rin po che lam 'bras tshogs bshad kyi smin byed kyi dbang dang / grol byed kyi khrid dang / rgyab rten lung dang bcas pa yongs su rdzogs pa'i tshar bdun dang / dpyid kyi dus de dag thams cad la dge bsnyen dang / dge tshul dang / dge slong gi sdom pa rnams legs par 'bogs par mdzad cing / 'on kyang dgung grangs lnga bcur son pa sa khyi lor lam 'bras grub mtshams su mgul cham lta bus cung zad snyun tshul bzhes pa la brten nas/ de lo'i grwa gsar rnams la rab byung bsnyen rdzogs kyi sdom pa rnams gcen mkhan chen rdo rje 'chang byams pa kun dga' bstan 'dzin gyis stsal bar mdzad do/ /gzhan yang de dag gi bar skabs rnams su'ang gdul bya so so'i mos pa dang bstun te dbang dang / rjes gnang dang / lung la sogs pa chos kyi bdud rtsi'ang ci rigs pa stsal te gdul bya rnams kyi rnam par grol ba'i lo tog mtha' dag ches cher rgyas par mdzad do/ /chos kyi bdud rtsi stsal ba de dag kyang bstan pa dang sems can gyi don 'ba' zhig la dgongs te/ phyag len phra mo tshun chad kyang sla chos su ma song bar dgag sgrub kyi bca' ba dam po mdzad pa ni mkhas pa rnams kyis bsngags pa'i gnas su gyur pa'i rnam thar ngo mtshar ba zhig go /dgung grangs zhe dgur son pa me bya lo'i hor zla lnga pa'i nang bod kyi rdo rje gdan dpal