[A:423]'od kyi thigs pas yongs su dran pa bzhin du lham mer bzhugs pa na/ sngon bcom ldan 'das la lha'i dbang po tshangs pa dang / brgya byin gyis bkra shis pa'i rdzas kyis mngon par mchod de/ chos kyi 'khor lo bskor bar gsol ba btab pa dang tshul mtshungs par chos kyi dung dang / lam 'bras glegs bam dang / bkra shis pa'i rdzas brgyad la sogs pa sngon du 'gro ba'i dpal ldan sa skya'i legs 'bul dang / e wa~M pa'i bla brang khag rnams dang / khang tshan bcu gcig dang / gzhan yang grwa rigs sbyin bdag dang bcas pa rnams nas rang rang gi 'byor pa dang bstun pa'i legs 'bul gyi dngos po ri ltar spungs te/ rgyal bas lung gis bsngags pa'i ngor chen rdo rje 'chang chen po'i chos kyi rgyal srid chen por yongs su mnga' gsol bas skal ba bzang po'i dus kyi chu gter dbyar gyi mtsho bzhin du rgyas par gyur to/ /gzhan yang ngor chen rdo rje 'chang chen po de nyid kyi dbang bskur ba'i gnas dbang khang du grags pa dang / de'i thog g.yabs chen du grags pa bcas kyi bzhugs khri so so'i steng du'ang khri 'bul zab rgyas dang bcas pas mnga' gsol zhing / de ltar bgyis pa'i dge tshogs rnams kyang 'khor gsum rnam par mi rtog pa'i bsngo ba'i rgyas 'debs par mdzad pa dang / de lta bu'i dus kyi tshe nam mkha'i dbyings thams cad kyang 'ja' sprin gyis gang ba la sogs pa bkra shis pa'i ltas mang po'ang / ji ltar padmo rnam par rgyas pa'i tshal du sprang rtsi 'thung ba'i bung ba gzhon nu'i tshogs rnams ma bsdus par yang ngang gis 'du ba bzhin du mngon sum du lhags par gyur to/ /de ltar chos kyi khri la zhabs sen bkod ma thag pa nas dpal gyi mgur las/ dung gi tshems bar nas 'phrul gyi ljags brkyangs te/ dus gsum