[A:427]las rang gi don ni ci yang med gshis bzang ngan ci 'gyur yang sgrig lam bsdam par thugs thag bcad de/ sa skya nas stsal ba'i bka' shog thams cad la bstan zhing / gtso cher sems dpa' chen po'i bca' yig ltar dang / de'i rgyab skyor du bca' yig gsar pa zhig kyang bzos te/ mchog dman kun gyis de bzhin byed dgos tshul gsungs pas/ thams cad kyis de bzhin byed par khas blangs te thil tshe 'dzugs pa'i skabs/ yid srubs kyis rgyud bslad pa'i skye bo ngan pa ngan 'gro'i g.yang sar mngon sum du rgyug par rtsom pa kha cig gis dkrugs pa'i rkyen gyis ji skad du/ shes rab med pa'i blun po rnams/ /mang yang dgra yi dbang du 'gro/ /zhes pa ltar mi nyag khang tshan pas thil tshe ma btsugs par brten rim gyis zlos gzhi je cher gyur te e wa~M pa'i bla khag lnga dang / khang tshan bcu phyogs gcig dang mi nyag khang tshan phyogs gcig tu byas te thog mar sa skya dang / de nas gzhis rtse rdzong dang / de rjes mda' dpon lcang lo can pa rnams su rim gyis gtugs te 'khrugs long je cher 'phel bar gyur rung / rje 'di'i mnal lam gyi gsal snang du/ gzim chung gi thog tu rgyal mtshan gyi srog shing zhig brtan par btsugs te/ de la rgyal mtshan gsar du bskon pa dang / yang bsang dar chen po zhig btsugs par phyogs gzhan zhig nas me chen po zhig 'bar te bsreg par brtsams kyang bsreg par ma nus pa la sogs pa'i mtshan ltas 'ga' zhig byung bar brten/ rang re rnams kyis sangs rgyas kyi bstan pa kho na bsams te dge 'dun gyi sgrig lam bsdams pa la/ bdud kyi ris kyis glags ltas par gyur na'ang / da ni mi ring bar yid srubs kyi dpung las rnam par rgyal bar 'gyur ro zhes lung bstan pa bzhin/ de kho na ltar mi ring bar pha rol po'i