[A:353]pa ljon shing mdzes par byed pa'i rgyan bcas dang / kye rdo rje'i rtsa ba'i rgyud brtag pa gnyis pa rnams thugs 'dzin mthar phyin par mdzad de e waM bla brang gzhung du rgyugs 'bul bar mdzad pa yin no/ /srid pa'i 'byor pa ring spangs kyang / /brtse bas gzhan don nyid la 'jug /yid can rnams kyi khur 'di yis/ /rgyal rnams thog ma nyid nas lci/ /de slad rnam par 'phrul pa yi/ /thabs ni gang dang gang zhig gis/ /'gro 'di ji ltar dbugs dbyung zhing / /snying rje'i bsam gtan kho nar g.yengs/ /smra ba'i nyin byed phal che ba/ /nub ring ngal bso brten pa'i tshe/ /rgyal kun ye shes zla ba'i gzugs/ /ljongs 'dir 'char ba'i sbyor ba brtsams/ /rgyal ba rnams kyi ye shes kyang / /gang du chags par gyur pa'i yul/ /'dod rgu'i ri mo rnam bkra ba/ /su yis bris pa yong mi shes/ /de lta'i yul du smin legs ma'i/ /lang tsho'i me tog 'bar ba'i dbus/ /dge mtshan snang ba brgya phrag dang / /lhan cig srid pa yongs su bzung / /thabs kyi ngo bo 'jam dpal dang / /shes rab rang bzhin dbyangs lha mo/ /rgyal ba'i gzugs sku bskyed pa'i phyir/ /yab yum zol gyis 'ong min nam/ /de nas mdzes sdug 'khyil pa yi/ /yid 'ong lha mo'i chu gter las/ /gzugs sku'i padmo 'khrungs pa ni/ /gser gyi mchod sdong 'bar ba bzhin/ /de mthong mi yi yul du ci/ /mtho ris na yang rnyed dka' ba'i/ /dpal 'di gang nas 'ong ba zhes/ /'gro ba'i mig ni zum ma gyur/ /shin tu dag pa'i mtshan dpe ni/ /nyin las nyin bzhin gsal gyur pa/ /de tshe lus can ngo mtshar bas/ /gzhon nu'i gsang sngags 'ba' zhig bzla/ /zhi zhing dul ba'i dri bzang po / /thog ma med nas gang sbyar ba/ /mtshan dpe'i me tog dgod tsam nas/ /yid can brtan pa 'phrog la chas/ /khyod kyi nges par 'byung ba'i