[A:354]spyan/ /'jig rten gsum na gsal ba yis/ /yul gyi dug dang rab ldan pa'i/ /khyim 'di sbrul nag khros par gzigs/ /de tshe srid pa'i sman pa yis/ /chos kyi sman chen sbyar ba'i zhing / /e wa~M byang chub dga' tshal du/ /zhabs zung gser gyi padma bkod/ /skye med yi ge dam pa'i mchog /gzod ma nyid nas brnyes zin kyang / /da dung slob pa'i zol sbyor gyi/ /sgyu 'dis bdag cag rmongs par byas// //spyi don gnyis pa gzhan dag bstan pa la 'jug pa'i go rim bstan pa'i ched du bslab pa rin po che'i sgor zhugs te thos bsam sgom gsum ji ltar mdzad pa'i tshul ni/ rje btsun 'jam pa'i dbyangs mkhyen brtse'i dbang po'i zhal snga nas mdzad pa'i rje 'di'i rnam thar gsol 'debs byin rlabs bdud rtsi'i chu gter las/ mkhas grub chen po bsod nams dpal 'byor mdun/ /thun bstan yongs su rdzogs pa'i sgor zhugs nas/ /rdo rje 'chang dngos nam mkha'i mtshan can gyi/ /thugs kyi sras su gyur la gsol ba 'debs/ /gzhan yang ris med bshes gnyen mchog rnams las/ /mang du gsan dang bsam pa'i mthar son nas/ /rtse gcig lam bzang bsgoms pa'i bdud rtsi yis/ /grub gnyis pad dkar bzhad der gsol ba 'debs/ /zhes gsungs pa ltar gyi don zhib tu bshad pa la gnyis te/ rgyal ba'i bstan pa rin po che'i sgor zhugs pa'i tshul dang / zhugs pa'i rten des thos bsam sgom gsum ji ltar mdzad pa'i tshul lo/ /de'i dang po ni/ ji skad du mdo las/ tshul khrims la brten tshul khrims la gnas na/ /rim gyis 'phags pa'i bden pa bzhi po dag /yang dag ji lta ba bzhin rtogs par 'gyur/ /zhes gsungs pa ltar thar pa dang thams cad mkhyen pa'i lam du bgrod pa la them skas kyi dang po lta bu med du mi rung ba'i gzhi chen po ni lhag pa tshul khrims kyi bslab pa nyid yin zhing /