[A:༦༥༡] ནད་བབ་ལ་བརྟགས་ཚེ་ཁྱེད་རྣམས་ཀྱི་ཡིད་ལ་ཅི་འདྲ་ཤར། ངེད་རང་ལ་ནི་ཅི་འགྱུར་ཆ་མ་མཆིས་སོ་གསུངས་པ་ཙམ་ལས་ཞལ་བཞེས་ཀྱི་གནང་བ་གཏན་ནས་མ་ཐོབ། བདག་གིས་མཎྜལ་སྐུ་གསུང་ཐུགས་རྟེན་དང་ཞབས་བརྟན་ཞིག་ཕུལ་བར་སྐུ་མདུན་དུ་བཅར་བས་ཁར་སེང་སྐོར་ནད་འདི་ཐུ་ཚབས་ཤིན་ཏུ་ཆེའང་ཨེམ་ཆི་ལགས་ནས་གསོལ་སྨན་སོགས་ཀྱིས་བཅོས་ཀ་མཛད་པས་དེང་སང་སྐྱོན་མེད་ཙམ་ཡོད། ཁྱེད་རང་ནས་འདི་རིགས་དཀའ་ལས་ཆེའང་རྗེས་སོར་འཕྲད་འོང་གསུངས་ཏེ་ཞིང་འདིར་བཞུགས་ཐུབ་པའི་ཞལ་བཞེས་ནི་མ་ཐོབ། འོན་ཀྱང་རྗེས་སོར་འཕྲད་འོང་ངོ་གསུངས་པ་ལྟར་ན་ཕྱི་མ་རྗེས་སུ་འཛིན་པའི་ཞལ་བཞེས་ཤིག་ཐོབ་བམ་སྙམ་དུ་ཕྱིས་ཡིད་ལ་ངལ་བསོ་ཅུང་ཟད་ཐོབ་བོ། །དེའི་ཚེས་གསུམ་གྱི་ཉིན་དགོན་པ་ནས་ཡར་བལྟས་པ་ན་རྒྱབ་རིའི་ངོས་སུ་བྱ་རྒོད་མང་པོ་རིའི་མགུལ་ཙམ་ནས་རྩ་བའི་བར་གཅིག་རྗེས་སུ་གཅིག་གཤིབས་ནས་ཕྲེང་བ་བསྒྲིགས་པ་ལྟར་འཁོད་པ་བདག་ཅག་རྣམས་ཀྱིས་མཐོང་བས་རྗེ་རིན་པོ་ཆེ་བསྙུང་གཞི་ལྕི་བ་འདི་དང་སྦྱར་ན་འདི་འདྲ་མཁའ་འགྲོའི་བསུ་མ་ལྟ་བུའི་ལྟས་སུ་མངོན་པས་ཞབས་བརྟན་སོགས་ལ་རྩེ་གཅིག་འབད་པར་རིགས་སོ་ཞེས་དཔྱོད་ལྡན་རྣམས་ཕན་ཚུན་མགྲིན་གཅིག་ཏུ་གླེང་བར་བྱས། དེ་རྗེས་སྲོད་ཀྱི་སྐབས་ཙམ་དུ་ཕྱག་མཛོད་ལ་ད་ནི་ངེད་རང་གི་ནད་ལྷག་མེད་དུ་དྲག་སོང་བས་རིམ་གྲོ་དང་སྨན་སོགས་ཅིའང་མི་དགོས། ཨེམ་ཆིའང་སང་ཉིན་སྔ་མོ་ནས་ཕེབ་པས་ཆོག་གོ་ཞེས་གསུང་འཕྲིན་བསྐུར་བར་མཛད། དེ་མཚམས་ཞབས་དྲུང་རིན་པོ་ཆེ་དང༌། གསོལ་དཔོན་སོགས་སྐུ་དྲུང་དུ་གནས་པ་རྣམས་ཀྱིས་རབ་ཏུ་བྱུང་ན་སྐུ་ཚེ་ཞབས་པད་ཡུན་དུ་བརྟན་ཅིང་བཞུགས་པ་ཞིག་དང༌། དེ་ལྟར་ཅིས་ཀྱང་བདག་ཅག་རྣམས་ཀྱི་