[A:༦༥༧]འཚལ་བ་དང་གསོལ་བ་འདེབས་པ་ལ་སོགས་པ་བྱེད་དུ་བཅུག །དེ་རྗེས་ཞབས་དྲུང་རིན་པོ་ཆེས་དབུས་བདག་ཅག་དཔོན་སློབ་ཁ་ཤས་ཀྱིས་དཔལ་ཀྱེ་རྡོ་རྗེའི་སྒོ་ནས་ལས་ཐམས་ཅད་ཀྱི་བུམ་པ་དང༌། གཞན་ཡང་རྣམ་འཇོམས་དང་སྨེ་བརྩེགས་བཅས་ཀྱི་སྒོ་ནས་ཀྱང་ལྷ་ཚོགས་འོད་དུ་ཞུ་བའི་བུམ་པའི་ཆུ་བདུད་རྩིའི་རང་བཞིན་ཅན་སྔོན་རོལ་ནས་ཆེད་དུ་བསྒྲུབས་ཟིན་པ་རྣམས་ཀྱིས་སྐུ་གདུང་རིན་པོ་ཆེར་སྐུ་ཁྲུས་ལེགས་པར་གསོལ་ཞིང་སྐུ་གསུང་ཐུགས་ཀྱི་རིག་སྔགས་དང༌། དཔལ་ཀྱེ་རྡོ་རྗེའི་རྩ་སྔགས་དང༌། སྙིང་པོ་དང༌། ཉེ་སྙིང་རྣམས་བྲིས་པ་སྐུའི་གནས་གསུམ་དུ་གདགས་པ་སོགས་རྒྱུད་ནས་ཇི་སྐད་གསུངས་པ་བཞིན་བགྱིས། གཞན་ཡང་བསིལ་སྨན་སྣ་ཚོགས་པ་དང་དྲི་བཟང་པོ་སྦྱར་བའི་ལྡེ་གུས་བྱུག །གོས་དར་དང་རས་ཡུག་ལ་སོགས་པས་ལེགས་པར་དྲིལ། དབུ་རྒྱན་དང་སྟོད་གཡོགས་སྨན་གཡོགས་ལ་སོགས་པའི་ལྷ་རྫས་ཀྱི་ན་བཟའ་མང་པོས་མཛེས་པར་བཀླུབས་ཏེ་གདུང་སྒྲོམ་གྱི་བཞུགས་ཁྲིའི་སྟེང་དུ་སྤྱན་དྲངས་ནས་བཞུགས་སུ་གསོལ། སྤོས་མར་མེ་ཞལ་ཟས་ལ་སོགས་པ་མཆོད་པའི་རྣམ་གྲངས་རེ་རེའང་བརྒྱ་ཕྲག་ལྔའི་གྲངས་ལས་བརྒལ་བའི་མཆོད་པ་སྣ་ཚོགས་པས་མཆོད་ཅིང་གསོལ་བ་གདབ་པ་སོགས་བགྱིས། དེ་དང་འབྲེལ་བར་སློབ་དཔོན་དཔའ་བོ་རྡོ་རྗེས་སྒྲུབ་ཐབས་རིན་ཆེན་འབར་བར་གསུངས་པ་དང་མཐུན་པར་དཔོན་སློབ་བཅུས་སྐུ་གདུང་རིན་པོ་ཆེ་རྣམ་སྣང་དགེས་པ་རྡོ་རྗེར་ཡན་ལག་བཞི་རྫོགས་སུ་བསྐྱེད་ཅིང་བཟླས་པ་བྱ་བ་སོགས་རྗེ་བཙུན་གོང་མའི་ཡིག་ཆ་བཞིན་བགྱིས། དེའི་ནུབ་ཞབས་དྲུང་རིན་པོ་ཆེ་འཇམ་དབྱངས་རིན་ཆེན་རྡོ་རྗེ་དབུར་བཞུགས་པའི་རྡོ་རྗེ་འཛིན་པ་དཔོན་སློབ་བཅུས་སྟ་གོན་གྱི་ཆོ་ག་