[A:༦༧༣]དཔའ་སྤངས་ནས་ནི། །ཕྱི་ནས་རིགས་ནི་རྣམ་པ་ལྔ། །འདོད་ཆགས་ཞེ་སྡང་གཏི་མུག་གིས། །དེ་རྗེས་རྣམ་པ་གསུམ་དུ་འགྱུར། །ཞེས་གསུངས་པ་ལྟར། སྤྱིར་ཡེ་ཤེས་ལྔ་དང་ཆོས་ཉིད་དེ་རིགས་རྣམ་པ་དྲུག་ཡིན་ཀྱང༌། ཆོས་ཉིད་སྤྱིར་བཏང་ན་ལྔར་འགྱུར་བ་དང༌། ཡང་ཉོན་མོངས་པ་ལྔ་དང་དེ་དག་གི་ཆོས་ཉིད་དེ་དྲུག་སྦྱོང་བྱེད་རིགས་དྲུག་ཏུ་གནས་ཀྱང་ཆོས་ཉིད་ཐམས་ཅད་ལ་ཁྱབ་པ་ལྟར་རྡོ་རྗེ་སེམས་དཔའ་སྤྱི་ཁྱབ་ཏུ་བཏང་ན་རིགས་ལྔར་འགྱུར་བར་གསུངས་པས་ཁྱེའུ་ལྔ་པོ་གཟིགས་པ་ནི་དེ་རྣམས་ཀྱི་མཚོན་བྱེད་དང༌། དེའི་ནང་ནས་ཁ་དོག་གསུམ་ལྡན་གྱི་ཁྱེའུ་གཟིགས་པ་ནི། ཡོན་ཏན་གསུང་དང༌། ཕྲིན་ལས་སྐུར་བསྡུས་ཏེ་སྦྱང་གཞི་དུག་གསུམ་སྦྱོང་བའི་ཕྱིར་ལྔ་པོ་དེའང་རིགས་རྣམ་པ་གསུམ་དུ་འགྱུར་བར་གསུངས་པ་དེ་ལྟ་བུའི་མཚན་མར་མངོན་ལ། རས་ཕྱར་ལྟ་བུའི་ལྟེབ་དུ་བཞུགས་པ་ནི་སྤྲུལ་པའི་རོལ་པ་བསམ་གྱིས་མི་ཁྱབ་པ་བསྟན་ཀྱང་བདག་སོགས་དམན་པ་རྣམས་རྨོངས་པའི་དྲི་མས་བསྒྲིབས་པས་ཚུལ་བཞིན་དུ་མི་རྟོགས་པ་འདི་དང༌། ཁང་སྟེང་དུ་བཞུགས་པའང་མདོ་སྡེ་རྒྱན་གྱི་བྱང་ཆུབ་ཀྱི་ལེའུ་ལས། དེ་བཞིན་གཤེགས་པ་དེ་ནི་དེར་བཞུགས་ནས། །རི་དབང་མཐོ་བར་བཞུགས་བཞིན་འགྲོ་ལ་གཟིགས། །ཞི་བར་མངོན་དགའི་འགྲོ་ལའང་ཐུགས་རྗེ་ན། །སྲིད་ལ་མངོན་དགའི་སྐྱེ་བོ་གཞན་ཅི་སྨོས། །ཞེས་གསུངས་པ་དང་ཆོས་མཐུན་པར་སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་ཟག་མེད་ཀྱི་དབྱིངས་མཐོན་པོར་བཞུགས་ནས་སྲིད་པ་དང་ཞི་བས་བསྡུས་པའི་འགྲོ་བ་མཐའ་དག་ལ་ཐུགས་བརྩེ་བ་ཆེན་པོས་གཟིགས་པའི་མཚོན་བྱེད་དང༌། ལྷག་པར་ཁྱེའུ་དམར་པོ་དེ་ཉིད་ཚུར་བྱོན་པར་གཟིགས་པ་ནི་གང་ལ་གང་འདུལ་གྱི་སྤྲུལ་པ་སྣ་ཚོགས་