[A:༥༩༠]བྲང་པའི་བཀའི་མདུན་ན་འདོན་རྣམས་དང༌། གདན་ས་འདི་ཉིད་ན་གཉུག་མར་བཞུགས་པའི་བླ་བྲང་ཁག་ལྔ་དང༌། ཁང་ཚན་བཅུ་གཉིས་དང༌། གཞན་ཡང་བསོད་ནམས་ཆེན་པོའི་དཔལ་གྱིས་མངོན་པར་མཐོ་བའི་འབྱོར་ལྡན་སྦྱིན་པའི་བདག་པོ་ཉི་ཟེར་གྱི་རྡུལ་ལ་ཅོ་འདྲི་བ་རྣམས་དང་བཅས་པས་རང་རང་གི་འབྱོར་པ་དང་བསྟུན་པའི་ལེགས་འབུལ་གྱི་དངོས་པོ་ཟད་མི་ཤེས་པར་སྤུངས་པ་སྤྱན་རས་ཀྱི་གཟིགས་པས་ཁྱབ་པའི་སའི་ཁྱོན་ཐམས་ཅད་ཕྱུར་བུར་གང་སྟེ་ཕ་རོལ་གྱི་ཕྱོགས་མི་མངོན་པར་གྱུར་ཏོ། །དེ་ཙམ་དུའང་མ་ཟད་ངོར་ཆེན་རྡོ་རྗེ་འཆང་དེ་ཉིད་ཀྱིས་སྨིན་བྱེད་ཀྱི་དབང་གི་ཆུ་བོ་ཆེན་པོ་འབེབས་པའི་བཞུགས་གནས་སུ་གྱུར་པ་དབང་ཁང་དུ་གྲགས་པ་དང༌། དེའི་སྟེང་གི་གཡབ་ཆེན་དུ་འབོད་པའི་བཞུགས་ཁྲི་སོ་སོར་ཕེབ་པ་ནའང་འཛད་པ་མེད་པའི་ཁྲི་འབུལ་གྱི་ཚོགས་དབྱར་དུས་ཀྱི་ཆུ་བོ་བཞིན་དུ་རྒྱུན་མ་ཆད་པར་གྱུར་ཏོ། །དེ་ལྟར་ཕུལ་བ་ལ་བརྟེན་ནས་སོ་སོའི་རྒྱུད་ལ་དགེ་བའི་རྩ་བ་གཞལ་དུ་མེད་པ་ཐེབས་པ་རྣམས་འཁོར་གསུམ་དུ་དམིགས་པ་མེད་པའི་ཏིང་ངེ་འཛིན་དང་ཐུགས་རྗེ་ཆེན་པོ་ཟུང་དུ་འབྲེལ་བའི་དགོངས་པ་ཟབ་མོའི་ངང་ནས་རྣམ་པ་ཐམས་ཅད་མཁྱེན་པའི་གོ་འཕང་ཐོབ་པའི་རྒྱུར་ཡོངས་སུ་བསྔོ་བའི་རྒྱས་བཏབ་སྟེ་བྱང་ཆུབ་སྙིང་པོའི་བར་དུ་འཛད་པ་མེད་པར་གོང་ནས་གོང་དུ་འཕེལ་བར་མཛད་དོ། །གནས་སྐབས་དེ་དག་ཏུའང་འཇའ་སྤྲིན་ཁ་དོག་སྣ་ཚོགས་པ་ལྗོན་ཤིང་ལྟར་ཕྱོགས་ཕྱོགས་སུ་གྱེས་པ་དང༌། པ་ཏྲ་ལྟར་ཟླུམ་པོར་འཁྱིལ་བ་དང༌། བ་དན་བཞིན་རིང་པོར་འཕྱང་བ་སོགས་མཆོད་རྫས་མང་པོའི་གཟུགས་བརྙན་ཅན་གྱིས་ནམ་མཁའི་དབྱིངས་ཐམས་ཅད་གང་བས་མཚོན་ངོ་མཚར་བའི་ལྟས་ཕུན་སུམ་ཚོགས་པས་ལྷ་དང་མིའི་འཇིག་རྟེན་པ་ཐམས་ཅད་ཡིད་རབ་ཏུ་འཕྲོགས་ཏེ་ཨ་ལ་ལ་དང་ཅ་ཅོའི་སྒྲ་ཆེན་