[A:623]bstan bcos dri ma med pa'i lung gi tshogs char du bsnyil bas rgyal ba'i bstan pa rin po che nyi ma shar ba ltar gsal bar mdzad pa yin no/ /de ltar bdag cag gi dpal ldan bla ma dam pa smra ba'i khyu mchog chen po 'dis brgal lan gyi rim pa de lta bu'i sgo nas 'bel ba'i gtam gtan la phab pa na 'ga' zhig ma rangs te rgol ba'i bsams pas nyid kyi drung du lhags te rtsod pa'i rim pa cung zad tsam yang gleng slong bar nus pa'i gang zag ma zhums pa'i spobs pa gzengs su mtho ba de 'dra ba ni rang gzhan gyi grub mtha' smra ba gang gi khrod na dus nam du'ang mngon par ma gyur la/ rnam par dpyad pa de dag kyang dgongs pa dang / dgongs pa ma yin pa la sogs pa mtha' drug gi tshul la mkhyen pa'i mnga' bdag tu gyur pa'i dbang gis rgyal ba nyid kyi dgongs pa rma med pa dang mthun par gtan la ma phebs pa ni mi srid pa yin no/ /rtsom pa ni/ spyir rje btsun dam pa 'di nyid kyi gsung rab rin po che rnams ni 'jig rten gsum na sgra dbyangs brjod pa ma lus pa gsal bar mdzad pa'i gsung gi dbang phyug chen po 'jam dpal gzhon nur gyur pa nyid kyi gsung gi gsang ba bsam gyis mi khyab pa dang dbyer mi phyed pa kho na ste/ de'ang 'jig rten pa'i lung sde chen po bzhi brjod bya'i gtso bor byas te tshigs su bcad pa dang / rkyang pa dang / spel ba gsum gyi bdag nyid can las lha'i dbang po'i bzhon pa glang po che sa srung gi bu'i lus lta buu la/ 'phags yul du byon pa'i phyogs kyi mkhas pa chen po dag gi bzhed srol tha dad pa dang / rang bzhin brjod pa sogs thun mong gi lam srol du gyur pa'i tshig rgyan gyi bye brag rnam pa mang pos lus kyi khyad par ji ltar mdzes pa de lta bu ni rin chen indra nI la dang / padma rA ga dang / margad la sogs pa 'jig rten na rin thang gzhal du med pa'i rgyan gyi tshogs bgrang du med