[A:534]gzugs su mdzad/ /sangs rgyas sems can skyabs dgongs pas/ /sangs rgyas gar mkhan gar mdzad de/ /ri bong stag dang seng ge dang / /glang po'i rigs can rnams su yang / /snying rje'i thugs kyi ston mdzad de/ /phyag rgya grub pas 'gro bar 'gyur/ /zhes gsungs pa ltar ro/ /de lta bas na yon tan gyi mthu phul du byung ba dang ldan pa'i sangs rgyas bcom ldan 'das rnams kyis gdul bya 'dul ba'i thabs su cho 'phrul gyi rnam par brtse ba sna tshogs su ston pas lha dang bcas pa'i 'jig rten thams cad cig car du mgo rmongs par 'gyur ba'i ye shes kyi sgyu ma chen po 'di'i rang bzhin dang yon tan ji lta ba yongs su rdzogs pa ni sa bcu'i byang chub sems dpa' rnams kyis kyang gzhal ba'i rngo mi thogs na/ de las gzhan pa'i blo gros dang ldan pa su zhig gis shes shing brjod par nus/ bsam gyis mi khyab pa'i gnas 'di ni shes bya thams cad la chags thogs mi mnga' ba thams cad mkhyen pa nyid kyi spyod yul 'ba' zhig tu gyur pa ste/ slob dpon ma ti tsi tras/ ji ltar khyod ni nyid kyis mkhyen/ /ji ltar khyod ni khyod 'dras mkhyen/ /ji ltar khyod gzhan mi 'dra ba'i/ /de 'dra khyod la phyag 'tshal lo/ /zhes gsungs pa ltar ro/ /der ma zad bdag cag blo gros dang mos pa dman pa rnams kyi rang bzhin dang skal pa ji lta bu yin pa nye bar gzigs pa'i dbang gis slob pa lam gyi gnas skabs su bzhugs pa'i byang chub sems dpa' chen po mchog gi rdo rje slob dpon chen po'i rnam 'phrul du ston pa 'di'i dbang du byas na'ang / ma rig pa'i ling thog gis blo gros kyi mig ldongs pa bdag lta bus ni rgyal ba'i sras po 'jam dpal