[A:535]gzhon nur gyur pa dang / byang chub sems dpa' kun tu bzang po la sogs pa sems dpa' chen po rnams kyi spyod yul dang mthun pa'i rje btsun dam pa 'di'i zhabs kyi 'degs 'jog tsam yang mi shes na/ thun mong ma yin pa'i rnam thar zab cing rgya che ba dag ji ltar smra bar nus/ de lta na'ang sangs rgyas kyi mdzad pa ni sems can gyi spyod pa dang mthun par ston pas re zhig bdag cag gdul bya dman pa rnams la thun mong du snang ba'i mdzad pa nyid las nye bar brtsams te rgya mtsho chen po las skra rtses blangs pa'i chu thigs ltar rnam par thar pa'i cha shas 'ga' zhig brjod pa la yid nye bar gzhol bar gyur pa ste/ 'di'ang rgyal sras zhi ba lhas/ ji ltar mtshan mo mun nag sprin rum na/ /glog 'gyu skad cig bar snang ston pa ltar/ /de bzhin sangs rgyas mthu yis brgya lam na/ /'jig rten bsod nams blo gros thang 'ga' 'byung / /zhes gsungs pa ltar skyabs gnas dam pa rnams kyi thugs rje'i mthu las byung bar gor ma chag ste/ yon tan mtha' yas pa'i bdag nyid can gyi rnam par thar pa 'di lta bu thos pa la brten nas rje btsun dam pa 'di nyid kyi rjes su slob par 'dod pa'i skyes bu skal ba dang ldan pa dag spro ba 'phel ba dang / gti mug dang phyogs 'dzin gyis bsgribs pa'i skye bo ma dad par gyur pa dang / dad pa can rnams kyi'ang dad pa'i myu gu gong nas gong du 'phel bar 'gyur ba dang / bdag gzhan gyi rgyud la bsod nams dang ye shes kyi tshogs gnyis rlabs po che yongs su rdzogs pa dang / slob dpon ma ti tsi tras/ mi rtag nyid dang rjes 'brel zhing / /las kyi glags la dogs bcas