[A:536]pa/ /bdag gi lce 'di nyid kyis ko /snying po ci'i phyir len mi bya/ /zhes gsungs pa ltar bdag nyid kyi lus dang lce'i dbang po don yod par 'gyur ba dang / mthar thug ngag gi sgrib pa thams cad las yongs su grol te bde bar gshegs pa'i gsung dbyangs yan lag drug cu 'thob par 'gyur ba sogs gnas skabs dang mthar thug gi phan bde bsam gyis mi khyab pa 'grub pa'i rgyu thun mong ma yin pa nyid du nges pa'i phyir ro/ /rgyu mtshan de dag gi phyir na skyes bu blo gros dang ldan pa dag gis skye ba'i phreng ba grangs med pa dag tu rnyed par dka' ba'i rtogs brjod rin po che me tog mandA ra'i chun 'phyang lta bu 'di dag dad gus kyi sor rtses blangs te thos 'dzin gyi rgyan du byos shig dang / rnam pa thams cad du bsod nams kyi phung po dpag tu med pas mdzes par 'gyur bar gdon mi za ste/ bcom ldan 'das kyis kyang / rigs thams cad kyi nang nas bla mar gyur pa shAkya rnams kyi skye ba'i rabs bzung zhing kun chub par byas nas gzhan la rgya cher bsnyad na chos dang mthun zhing bsod nams kyi phung po dpag tu med pa 'byung la/ yon tan bsam gyis mi khyab pa 'phel bar byed do/ /zhes rigs gang las skyes bu dam pa byon pa'i sngon gyi rabs bsnyad na bsod nams mang du thob par gsungs na/ bdag gzhan gyi rgyud la sangs rgyas kyi ye shes skyed par mdzad pa'i bla ma rdo rje slob dpon gyi phul du byung ba'i mdzad pa brjod pa las nges par brtsams pa'i chos kyi bdud rtsi la longs spyod pas bsod nams kyi tshogs rgya chen po 'phel bar 'gyur ba lta smos kyang ci dgos pa'i phyir ro/ /de ltar dgos pa gya nom pa dang ldan pa'i tshig gi sbyor ba 'ga' zhig sngon du brjod nas/ skabs