[A:669]gzungs bla ma brgyud pa'i mtshan 'bum nas bzung bkra shis kyi bar rgyud sde bzhi dang 'brel ba'i gzungs rgyas pa cha nyi shu'i skor dang / dngul gdung rin po cher cha bco lnga skor dang bcas pas phyur bur bkang ste/ mgon dkar yid bzhin nor bu'i sgo nas bsgrubs pa'i gter bum dang / gnod sbyin 'khor lo tshad ldan gyis zhabs bsdams pa'i bar rje btsun gong ma'i bzhed pa ji lta ba la 'khrul pa'i dri mas cung zad tsam yang ma sbags par legs par bsgrubs so/ /de dag gi skabs su ston mo dang / rgyun gyi bza' btung dang / yon 'bul dang / gnang sbyin la sogs pa phun sum tshogs pa dag gis shin tu tshim par mdzad pas dga' zhing mguu la yid rab tu dwangs pa'i bzo rig pa rnams kyang bzhin ras kyi zla ba sprin dang bral ba la 'dzum dkar gyi 'od zer rnam par mang po g.yo zhing dga' spro'i glu dang bsngags brjod kyi phreng ba grangs med pa dang bcas te chas par gyur to/ /de ltar tshul bzhin bzhengs pa'i rten khyad par du 'phags pa de dag la thog mar tshe dpag tu med pa la brten pa'i rab gnas nyin gcig dang / de rjes zhabs drung rin po che 'jam dbyangs rin chen rdo rje dbur bzhugs pa'i bdag cag dpon slob bco lngas nyin lnga'i bar du dpal kye rdo rje'i sgo nas bzang po drug ldan gyi rab tu gnas pa shin tu rgyas pa zhig mdzad de/ de dag gi skabs su'ang khyad par du 'phags pa'i rten gsar rnying rnams kyi spyan sngar 'phags pa kun tu bzang po'i rnam 'phrul la 'gran par bzod pa'i mchod pa'i phreng ba grangs med pas mngon par mchod cing / rim gnyis kyi rtog pa brtan po la dbang 'byor pa'i dge slong rdo rje 'dzin pa chen po rnams la ji ltar bzhed pa'i