[A:537]su bab pa'i gtam gleng ba dngos ni/ de'ang bskal bzang gi sgron me bzhi pa bcom ldan 'das shAkya seng ge'i bstan pa'i mjug 'di bdag nyid chen po 'di nyid kyis thub pa'i dbang po'i bstan pa rin po che slad kyis nyams dma' ba dag gso ba dang / bdag cag la sogs pa'i gdul byar gyur pa'i 'gro ba mgon med pa dag kyang yongs su bskyab pa'i phyir 'jig rten gyi khams 'dir skye ba yongs su gzung bar bzhed de/ mi mjed 'jig rten gyi khams kyi dbus kyi gling chen po bzhi pa'i lho'i 'dzam bu'i gling gi lte ba byang chub snying po rdo rje'i gdan las byang phyogs su dpag tshad brgya phrag lhag tsam bgrod pa'i gnas/ gangs ri dpal dang ldan pa'i phreng bas bskor ba'i ljongs/ nam mkha' reg pa la thug pa'i ri bo chen po rnams la ri phran rnam bka' nod pa bzhin/ me long gi ngos ltar snyoms pa'i thang chen po rnams ni nam mkha'i mtha' 'tshol ba 'dra ba/ grib bsil 'khor yug tu yod pa'i shing ljon pa rnams ni char sprin 'khrigs pa lta bu/ rma bya dang ne tso la sogs pa'i 'dab chags mang po gshog sgro sgyur zhing skad snyan pa 'byin pa/ byang chub sems dpa' myur du 'jig rten na gshegs pa'i gtam snyan po dag khyer te 'ong ba lta bu'i chu klung mang po sgra sgrog cing 'babs pa dang / mtsho chen po utpala'i 'dab ma ltar sngo ba rnams ni ched du bshams pa bzhin/ ne'u gseng sngon pos khyab pa'i sa phyogs mdzes shing yid du 'ong ba du mas brgyan pa/ padma dkar po la sogs pa me tog mang pos mdzes par khebs pas sa phyogs rnams nyams dga' dga' ltar 'dug pa/ bung ba mang po lding zhing 'khor bas shes pa brjod pa lta bu'i sgra snyan po kha ton du