[A:539]brgyan pa/ dkon mchog la dad pa dang / sems can la snying rje che ba sgrol ma tshe ring zhes bya ba ste/ de ltar na yul dang rigs rus la sogs pa phun sum tshogs pa 'dzoms pas mtshon dge mtshan dang ldan pa'i gnas skabs gang yin pa de nyid sgrib pa med pa'i ye shes kyi spyan ras rnam par gsal bas nye bar gzigs te bar snang las glog dmar g.yo ba lta bu'i cho 'phrul chen pos yum gyi lhums su zhugs so/ /de'i tshe'ang yum gyi sku lus shing bal gyi 'dab ma ltar yang zhing snga na med pa'i dga' bde dang / chos mthun gyi spyod pa la lus sems las su rung ba dang / rmi lam gyi ltas bzang po rgyun mi 'chad pa la sogs pa bkra shis pa'i dge mtshan phun sum tshogs pa mang po ched du bos pa bzhin mngon sum du lhags par gyur la/ de nas rab byung bcu bzhi pa'i nang gses sa mo glang gi lo'i hor zla gsum pa'i tshes bcu drug res gza' zla ba dang / skar ma sa ri 'dzoms pa'i nyi dros tsam gyi dus su sprin dang bral ba'i nyi ma gzhon nu shar gyi ri bo'i rtse mo nas mngon par 'char ba bzhin du ngo mtshar ba'i ltas du ma dang bcas te bltams so/ /de ltar bltams pa nas brtsams te rgyal khams kun tu phyi dgra dang nang 'khrugs kyi 'tshe ba med cing / 'byor pa dang / rgyas pa dang / bde ba dang / lo legs pa dang / khyad par du yab yum gyi dpal 'byor longs spyod thams cad yar gyi ngo'i zla ba bzhin gong nas gong du 'phel ba sogs ngo mtshar phun sum tshogs pa byung la/ khye'u de'ang bskal pa du mar bsod nams kyi tshogs la goms pa brtas pa'i rang 'bras zla ba'i 'od zer spungs pa lta bu'i sku lus dkar zhing snum pa/ zhal gyi dkyil 'khor padma gzhon