[A:540]nu kha bye ma thag pa lta bur mdzes shing yid du 'ong ba/ dbu gdugs ltar 'dug pa/ dpral ba'i dbyes che ba/ shangs kyi gzengs mtho ba sogs skyes bu chen po'i mtshan bzang dri ma med pa dang ldan pas lha dang bcas pa'i 'gro ba ma lus pa'i yid kyi brtan pa dbang med du 'phrogs par gyur to/ /de lta bu'i yon tan dang ldan pa'i khye'u zla ba tshes pa lta bu de nyid dkar gsum la sogs pa kha zas kyi khyad par sdig dang ma 'dres pa dag gis sman gyi shing ljon pa bzhin rim gyis skyed bsrings pa ste/ de'ang re zhig tshu rol mthong ba rnams kyi snang ngor lang tsho'i me tog thog ma nyid du gyur pa'i gnas skabs na'ang lus ngag yid gsum bag med du gyur pa'i rtsed mor g.yeng ba sogs tha mal pa'i byis pa'i spyod pa las shin tu 'das te zhi ba dang / dul ba dang / bag yod pa dang / kun spyod gtsang ba dang / yab yum la sogs pa yon tan dang na tshod kyis rgan pa rnams la gus shing zhe sa dang ldan pa dang / dman pa rnams la lhag par byams pa la sogs pa ya rabs kyi spyod pa phun sum tshogs pa nyin re bzhin yang gong nas gong du 'phel bas dam pa'i rang bzhin rnam pa mang po mngon sum du gsal bar gyur la/ khyad par du'ang / theg pa chen po mdo sde rgyan las/ sbyor ba'i sngon du snying rje dang / /mos pa dang ni bzod pa dang / /dge ba yang dag spyod pa ni/ /rigs kyi rtags su shes par bya/ /zhes gsungs pa ltar sdug cing phongs pa'i sems can dag gzigs pa'am gsan pa tsam gyis mi bzod pa'i snying rje drag pos spyan chab rang dbang med par ldang ba dang / chos dang chos smra ba dag la bdud las kyis mi phyed pa'i dad pa brtan po dang / gzhan gyi don du tsha grang dang ngal dub la sogs pa la ji snyam du mi sems