[A:558]tsam ston par mdzad pa la'ang snga dro rer shog ldeb mda' tshad ma bcu re tsam bstar chags su thugs la chud pa'i tshul mdzad pa ni bdag nyid kyis dngos su myong bas grub pa yin no/ /de ltar thugs 'dzin mdzad pa'i tshe'ang skabs skabs su dbang lung 'dra gsan pa dang / gsung rtsom phran bu 'dra'ang mdzad pa sogs de kho na la chig dril du ma byung ba bcas gang ltar yang zla ba bcu'i khongs su yongs su rdzogs par grub ste bla brang du rgyug 'bul bar mdzad/ de tsam na sngar dang mi 'dra ba'i mkhyen rab kyi klong chen po brdol ba lta bus sngon chad rigs pa'i lam du ngal ba brgya phrag gi khur khyer ba'i rtog ge ba rgan po mang du thos par rlom pa rnams kyis kyang ji lta bar gting mtha' dpog par mi nus pa'i gzhung lugs chen po dag gi dka' ba'i gnas phal cher 'bad med du mkhyen pas mkhas shing mkhas par grags pa phal mo che'i yid yongs su 'phrogs par gyur te/ bka' las kyang deng skabs sngar ma go ba'i gzhung lugs rgya chen po dag gi dka' ba'i gnas 'ga' zhig 'bad mi dgos par rang byung du rtogs pa zhig byung ste/ gzhung bdun 'di nyid mthar phyin par rgyug 'bul grub pa sogs rtsa ba'i bla ma mkhan chen rdo rje 'chang de nyid kyi bka' ma bcags par dgongs don tshul bzhin du bsgrub pa 'dis rgyud la byin rlabs cung zad 'jug pa'i rtags yin pa 'dra zhes bka' stsal to/ /de nas dgung grangs bcu dgu pa'i mjug nas bzung nyi shu pa'i nang bar gnas lnga rigs pa'i mkhas pa chen po 'jam pa'i dbyangs ngag dbang legs grub bam/ mtshan gzhan ngag dbang blo gros gzhan phan mtha' yas pa'i 'od zer du grags pa'i zhal snga nas sgra'i bstan bcos ka lA pa'i ri mo yongs su rdzogs pa'i bka' khrid zhus te dpyis phyin pa mkhyen par mdzad