[A:527]bde ba la g.yeng ba'i nyan rang thams cad mthar thug gi myang 'das rnam pa thams cad mkhyen pa'i grong khyer du 'khrid pa/ rmad du byung ba'i thugs rje dang thabs la mkhas pa'i mdzad pas sems can thams cad srid pa gsum gyi 'dam rdzab las bton te thar pa chen po'i go 'phang la 'god pa/ mkhas pa dang / grub pa dang / rig pa 'dzin pa thams cad kyi spyi bo la zhabs sen gyi padmo ngal bso ba/ 'chad rtsod rtsom gsum gyi mdzad pas bstan pa rin po che 'jig rten gyi khams thams cad du yongs su khyab par mdzad pa/ rigs thams cad dang dkyil 'khor thams cad kyi bdag nyid drug pa rdo rje 'chang chen po dang gnyis su ma mchis pa/ sa'i steng na nyi ma dang zla ba ltar 'gran pa'i zla thams cad dang bral ba/ mtshan brjod par dka' ba'i rje btsun dam pa 'di ni dus bskal pa dpag tu med pa'i sngon rol nas gsang chen thun mong ma yin pa'i nye rgyu'i lam la brten nas phyi nang gi mngon par byang chub pa lnga'i rim pas lam gzhan gyis spong bar ma nus pa'i sgrib pa gnyis kyi bag chags shin tu phra zhing phra ba rnams kyang slar mi ldog pa'i tshul gyis spangs pa la brten nas sku dang ye shes gnyis su med pa'i bdag nyid can du mngon par rdzogs par sangs rgyas te stobs dang / mi 'jigs pa dang / ma 'dres pa la sogs pa'i yon tan bsam gyis mi khyab pa'i bdag nyid can du bzhugs pa yin no/ /de ltar yin pa gang las shes zhe na/