[A:582]na mtha' yas shing brjod pa'i grangs las 'das pa zhig snang mod/ 'dir ni yi ges 'jigs pas bri bar ma nus kyang blo gros dang skal bar ldan pa'i gang zag dag gis rje 'di'i gsan yig yid bzhin gyi nor bu rin po che'i bang mdzod bye ba phrag brgya'i sgo 'phar dus gcig tu dbye ba dang mtshungs pa dag la zhib tu gzigs te rmad du byung ba'i rnam par thar pa rgya mtsho chen po dang 'dra ba 'di lta bu'i rjes su bslab par bya'o/ /de ltar thos pa rgya mtsho'i pha rol tu phyin pa de'ang / 'phags pa lhag pa'i bsam pa bskul ba'i mdo las/ ji ltar shun pa de bzhin smra ba ste/ /ro lta bu ni 'di la don sems yin/ /de lta bas na smra la dga' spangs te/ /rtag tu bag yod byos la don soms shig /smra ba'i nyes pa 'di 'dra rtogs gyur cing / /don gyi yon tan mchog 'di shes nas ni/ /'di na byang chub mkhas pa gang yin pa/ /des ni don bsam pa la dga' bar gyis/ /zhes gsungs pa ltar thos pa tsam du ma bzhag par bsams byung gi shes rab kyis thos pa'i don la yang dang yang du dpyad cing rigs pa'i tshogs mtha' yas pas gtan la phab pa'i sgo nas/ zab mo lta ba'i gnas lugs la rgya chen spyod pa'i rim pa sgom pas nyams su len pa sogs kyi gnas skabs gang dang gang la'ang ma rtogs pa dang / log par rtog pa dang / the tshom gyi 'ching ba sogs 'khrul pa'i dri ma phra mo tsam yang med par thugs kyi dpyad pa yongs su rdzogs par mdzad pa yin no/ /zhabs sen nyi ma 'char ka'i 'od kyis ni/ /mtha' klas rgyal ba'i cod pan mdzes gyur kyang / /bshes gnyen nor bu'i phreng bas gtsug tor mchog /slar yang mdzes pa dam pa'i rtse mor bsgrubs/ /rnam pa thams cad mkhyen pa'i