[A:607]yod pa rje 'dis zhabs drung rin po cher spyan cer gzigs shing zhal 'dzum pa dang bcas khang sar sprul sku rin po che da lo khams nas pheb pa'i skad cha 'dra gsan nam gsungs par/ zhabs drung rin po che nas de sngar ci'ang ma thos mod rang gzhan tshang mas 'di lo pheb rtsis byed kyin yod lags zhus pas/ rje 'dis bdag gi rmi lam 'di la bltas na da lo'i mkhan po de khyed rang ma gtogs gzhan la 'gro sa mi 'dug go gsungs pa dang / zhabs drung rin po che nas bdag spyir na phra/ lhag par slob gnyer ma rdzogs pas de 'dra ga la 'ong zhus pas/ gang ltar yang lam 'bras sogs thugs 'dzin mdzad na legs so/ /zhes gsungs pa ltar rjes sor de kho na bzhin byung ba dus gsum sgrib med du gzigs pa'i gsung du gzod yid ches so zhes mkhan chen rdo rje 'chang ngag dbang bsod nams rgyal mtshan nyid kyis bdag la bka' stsal to/ /gang ltar yang khams nas zhabs drung rin po che de nyid de lo chibs bskyod gnang ma thub stabs rje 'di nyid dgung grangs so gcig pa sa mo lug gi lo'i smal po zla ba'i tshes bcu gcig gza' skar legs 'grigs phun sum tshogs pa'i nyin bstan pa'i gtsug rgyan ngag dbang bsod nams rgyal mtshan pa nyid rje rgyal ba gnyis pa'i chos kyi khri chen po la mnga' gsol te bkra shis kyi char dbab par mdzad do/ /de nas rim pa bzhin bla brang steng shod skor gyi rtsis sprod rnams kyang legs par grub bstun gsar du sbyor 'jags stsal ba la/ lha khang khag so sor gos chen gyi phye phur shin tu legs pa cha re/ gtsug lag khang du sgrub mchod chen mo'i skabs dpal kye rdo rje'i rdul tshon gyi dkyil 'khor la 'bul rgyu'i gos chen khA ta'i gser mig gi yol ba/ dbang khang du bye ru'i phreng ba shin tu spus