[A:606] 'gro don thugs bskyed/ mnga' 'bangs brtse skyong sogs mdzad pa phrin las kyi cha shas re re la brtags kyang so so'i skye bo'i blo'i ra ba las brgal bas/ e ma ho/ bdag cag rnams kyis bsod nams ci 'dra ba zhig bsags na/ skal ba bzang po'i nyi ma 'di lta bu shar ba'i dus 'byung ba/ zhes mchog dman thams cad kyis mgrin gcig tu gleng zhing yid smon pa'i gnas su gyur pa nas/ snga ma sa rta lor dpal ldan sa skyar 'jam mgon khri chen rin po cher e wa~M bla brang gi gdan sa'i dgongs khrol nan tan du zhus pa dang / lhag par ngor rang gi bla khag khang tshan tshang mar bka' khyab shin tu nan chags su stsal bar/ spyir rje 'di nyid thugs bskyed dang phrin las gzhal du med pa'i dbang gis lo shas tsam zhal 'dzin skyong thub byung na rgyal ba rdo rje nyid dngos su bzhugs pa lta bu'i 'du shes kyis thams cad kyis 'di phyi'i 'dun ma thams cad dus cig car du 'grub bo snyam pa'i 'dun pa shin tu che'ang / rdo rje'i bka' lung sbrom chen po shin tu brling zhing lci ba'i khur kyis mnan pa gyen du bzlog pa'i go skabs cung zad tsam yang ma rnyed nas khang sar zhabs drung rin po che 'jam dbyangs shes rab rgyal mtsho mkhan tshab tu gdan sa chen por 'os 'du phul bar/ de skabs zhabs drung rin po che de nyid khams kyi gling mgo zi dgon du bzhugs skabs yin pas rje de nyid kyi mdun nas dpal sa skya nas kyi bka' dang / e wa~M pa'i bla grwa spyi'i zhu yig bcas phul bar brten/ thams cad kyis lug lo'i ston thog nges par pheb rtsis la/ skabs shig rje 'di nyid bla brang du bzhugs te gzhi gsum 'dzugs skor gyi zhal bkod 'dra mdzad pa zhig la/ khang sar zhabs drung rin po che ngag dbang bsod nams rgyal mtshan pa dang / mi nyag dpon slob nam mkha' rgyal mtshan gnyis sku mdun der bzhugs