[A:613]rje ltar sra ba la'ang mig nas mchi ma rang dbang med par 'khrugs pa byung ngo / /'di skabs mdo smad kyi sa'i bye brag nyag rong gi yul nas lcags mdud dpon mgon po rnam rgyal zhes bya ba sngon gyi tshe rab rnams su mi dge ba bsags pa'i las mthu ldan du smin pas rgyud bskul te/ mdo khams smad phyogs kyi yul gru phal cher drag po dpung gi sbyor bas rmeg med du bcom par ma zad/ bstan pa'i sbyin bdag chen po sde dge chos rgyal mchog gi chab srid la'ang ched du rgol bar chas pa na/ mi dbang sa'i tshangs pa chen po de nyid kyi chab srid mi nyams par gong nas gong du 'phel ba dang / khams phyogs kyi bstan 'gro yongs la 'phral yun du nyer 'tshe dang bral ba'i bde legs kyi ngal 'tsho thob pa dang / bsgral bya de nyid kyang ngan 'gro'i lam du phyogs pa la thugs rje lhag par skyes pas rdo rje'i chos srung gi tshogs rnams drag po mngon spyod kyi las la bskul ba'i gtor zlog gi cho ga g.yul las rnam par rgyal ba'i ru mtshon chen po rab tu bsgrengs pas/ de nas brtsams te gdug pa can de nyid kyi mthu stobs ma lus pa rim gyis zad nas/ mthar/ blun po'i rig dang 'byor pa stobs/ /pha rol nye bar gdung ba'i slad/ /sbyor ba rnams ni 'phral la nyid/ /srog dang lhan cig nyams par 'gyur/ /zhes rtogs brjod rin po che las gsungs pa dang mthun par mi nor longs spyod gnas khang dang bcas pa ming tsam mi mngon par thal bar gyur te/ rnam par shes pa mi bskyod pa'i zhing du yud kyis song ba gyur to/ /dgung grangs so lnga pa chu phag lo'i dpyid kar bla ma bstan pa dar rgyas kyis zhus te kye rdor bka' babs bzhi'i dbang dang / sgrub thabs rgya mtsho'i rjes gnang rgya gzhung gi lung bcas stsal/ lo de'i hor zla