[A:621]sangs rgyas kyi bstan pa gzhir byas pa la'ang 'phags bod kyi skyes chen dam pa so so'i bzhed pa tha dad pa du ma'i rjes su 'brang ba la brten nas rang rang gi lugs srol 'dzin pa mtha' yas pa zhig snang ba de dag la/ rje btsun dam pa 'dis ni rang phyogs la chags pa dang / gzhan phyogs la sdang ba sogs nyes pa'i dri ma bag chags dang bcas pa yang dag par spangs ba'i stobs kyis/ ji skad du/ rnal 'byor spyod pa bzhi brgya pa las/ chos 'di de bzhin gshegs rnams kyis/ /rtsod pa'i ched du ma gsungs te/ /de lta'ang 'dis ni gzhan smra rnams/ /bsregs te me yis bud shing bzhin/ /zhes gsungs pa dang tshul mtshungs par bstan pa rnam par dag zhing sems can thams cad kyis yang dag pa'i don ji lta ba bzhin rtogs par gyur na ci ma rung snyam pa'i dgongs pa rnam par dag pas rnam par dpyad pa cung zad mdzad pa'i shugs kyis nyi ma shar bas mun pa 'jig pa ltar rgol ba ngan pa thams cad rang bzhin gyis 'jig par gyur pa ni ma gtogs kyi/ gzhan du chos dang gang zag la sdang bas pha rol zil gyis gnon par 'dod nas gzhan gyi grub mtha' rnam par dag pa la dag par shes bzhin du thabs sna tshogs kyi sgo nas skyon ji snyed pa nan gyis 'tshol ba sogs dam pa ma yin pa'i spyod pa de lta bu ni thar pa'i lam du mi 'gyur zhing / ngan 'gro'i rgyu las ma 'das pa'i phyir rnam pa thams cad du mi bzhed pa yin no/ /de lta mod kyi rigs pa dang mi rigs pa cung zad dpyod par nus pa'i sde snod 'dzin pa dag gis bde bar gshegs pa'i bka' dang / de dag gi dgongs 'grel rnams dang / rje nyid kyis mdzad pa'i gsung rab rin po che rnams dang / gzhan yang 'chad pa'i tshul 'ga' zhig las brtsams te ma rtogs pa dang /