[A:532]gzhan gyi chos dbyings mnyam pa nyid du gzigs pas phrin las don yod par mkhyen pa dang / 'khor ba la mtha' med pas thugs bskyed dang mthun pa'i mdzad pa yongs su ma rdzogs pa'i phyir rnam par rtog pa'i 'bad rtsol med par phrin las kyi 'khor lo lhun gyis grub cing rgyun mi 'chad pa'i tshul gyis sems can gyi don 'ba' zhig mdzad pa 'di ni chos nyid yin te/ rgyud bla ma las/ gzhan gyi dbang gis nges 'byung dang / /bdag dang sems can mtshungs gzigs dang / /mdzad pa yongs su ma rdzogs phyir/ /'khor ba srid du mdzad mi 'chad/ /ces dang / gdul bya'i khams dang 'dul ba'i thabs dang ni/ /gdul bya'i khams kyi 'dul ba'i bya ba dang / /de yi yul du su dag gshegs pa la/ /khyab bdag rtag tu lhun gyis grub par 'jug /ces dang / mdo sde rgyan las/ ji ltar mkha' la 'jig rten gyi/ /bya ba rgyun mi 'chad par snang / /de bzhin zag med dbyings na yang / /rgyal ba'i mdzad pa rgyun mi 'chad/ /ces gsungs pa lta bu'o/ /des na 'jig rten gsum na rmad du byung ba'i thugs rje dang / thabs la mkhas pa'i khyad par bsam gyis mi khyab pa'i phrin las kyi 'jug pa de lta bu'i sgo nas gdul bya 'dul ba'i dbang nye bar bzung ste/ rang rang gi blo gros kyi rim pa dang mthun par 'og min la sogs pa sangs rgyas kyi zhing khams brjod du med pa dag na longs spyod rdzogs pa'i sku dang / gnas thun mong ma yin pa rdo rje btsun mo'i bha ga la