[A:265] bstan pa 'di la sngon chad ma byung ba'i ngo mtshar phul du byung ba'i mdzad pa mchog gi dga' ston chen po dkar phyogs pa thams cad kyi snying gi bcud du sbyin pa'i sgo yangs par phyes so/ /a ho rgyal ba'i mdzad pa bsam mi khyab/ /rgyal sras rnams kyi smon lam bsam mi khyab/ /bsam gyis mi khyab pa la bsam byas pas/ /bsam pa'i ra ba shong ba'i skabs ma rnyed/ /ston 'khor dbye bar mi phyed chos kyi sku/ /ston 'khor mnyam par snang ba longs spyod rdzogs/ /ston 'khor mchog phal snang ba sprul pa'i sku/ /gcig nyid du ma'i zlos gar rtsen 'di mtshar/ /srid dang zhi ba'i khams na dge legs kun/ /'dzad med 'jo ba'i nor bu'i ljon pa de/ /dam chos 'dzin pa'i smon lam bzang po las/ /'khrungs pa'i 'phrul thabs 'di ni ya mtshan to/ /'jam dpal gzhon nu'i ngo mtshar las blangs pa/ /rmad byung lo 'dab mang pos nyer mdzes pa'i/ /gzhon nu'i skabs kyi yal 'dab gnyis pa 'di/ /sa gsum kun dga'i mgon du srid 'dir dar/ /dgung grangs nyer brgyad bzhes pa'i dus su gza' tshes dge bar e waM thar pa rtse'i zhabs drung mnga' gsol gnang / khu na paNDi ta'i mdun nas kyang gur zhal gyi chos skor rnams gsan/ de nas mdo smad sde dge'i mnga' 'og tu thar rtse'i sgar skyong gi byon bzhugs dgos pa'i bka' phebs pa la/ rigs kyi bdag po'i bka' lung nor bu'i cod pan spyi bor len pa las phra mo tsam zhig mi 'gal ba'i ched dang / 'jam dbyangs ngur smrig gos can mkhyen rtse'i