[A:264]gnas lus 'di phyi gang ltar gyur kyang de kho na'i don du nan tan snying por bgyid na rjes su yi rang ngo / /bla ma brgyud pa dang bcas pa rnams kyis thugs kyis 'dzin cing byin gyis brlab bo/ /nga yang sgyu lus 'di nang ji tsam sdod mi shes so gsungs so/ /de lta bu'i bka' mchid lhug par stsol ba'i mod la/ dga' skyo 'dres ma brjod mi shes pa'i ngang nas thal mo yang yang sbyar te cung zhig 'khod par gyur cing / skabs shig na dbugs dbyung ste 'di skad ces gsol to/ /rdo rje'i gsung gis gnang ba de lta bu thob phyin chad/ bag med kyi dbang du mi btang zhing / rang gi shes rig 'byor tshogs gang yod rtsal sbrugs su bgyid do/ /ces zhus pas yang 'di ltar gdams par mdzad de/ rje bla ma thams cad mkhyen pa 'jam dbyangs mkhyen brtse'i dbang po'i zhabs pad du nye bar bsnyen na legs tshogs thams cad gong 'phel du 'gyur bas/ de ltar thugs la 'jog pa gal che'o/ /zhes gsungs pa'i mod la/ dga' bde myong du yod la smra ru mi gtub pa'i ngang la 'byams shing / de bzhin du bsgrub bo/ /de bzhin du bgyid do ces zhus shing / gzhan yang bslab bya zhal gdams snying gi bdud rtsi lta bu mang po lhug lhug gnang zhing thugs sras kyi dwang mar bzung ste gsang chen rgyud sde rab 'byams kyi smin grol rgya mtsho dus kyi mthar yang mi nyams pa'i srog rtsa mthud nus pa'i bka' yi bsdu ba po dbang bskur shing / gsung gi gsang ba rnam pa thams cad pas mnga' gsol ba dang / thugs yid gcig tu 'dres pa'i byin rlabs kyi nus pas gzengs bstod pas/