[A:283]so/ /dbang bka' re tsam thob mi thob kyi the tshom shar tshe gsol ba thugs la mi 'phrod pa dang sku khams rnyogs pa'i thugs ngal chen po bzhes te gsan pa mthar phyin par mdzad/ de nas rje btsun bla ma thams cad mkhyen pa 'di nyid bka' 'dri zhu ba'i yul yod bzhin tu bdag gis nyin mtshan bar med du brtson par ma byas na nam zhig 'gyod pa'i dus shig 'ong ba gdon mi za bas da ni steng nas gnam rdo lhung ba dang 'og nas chu than brdol bar gyur kyang las su bya ba de las ldog par mi bya'o zhes dam bca'i go cha bzhes nas rje nyid dgung grangs so drug par chu rta lor gza' skar sbyor ba legs pa'i nyin zhig la rgyud sde'i chog khrigs kyi dbu 'dzugs par mdzad do/ /dus de nyid nas bzung ste/ thugs dam nyams bzhes dang / dbang chos gsan skabs ma gtogs pa thugs brtson chu bo'i rgyun bzhin du bskyed de rgyud sde so so'i bka' babs brgyud ldan gyi bla ma dam pa gang dag bka' srol gang yin pa de la tshad mar bya ba'i 'os su gyur pa de'i yig rnying khungs thub byin rlabs kyi brgyud pa ma chad pa de kho nar gzhi dang rtsa ba srog ltar bzung ste/ dogs gnas phran bu tshun chad rje 'jam dbyangs bla ma la bka' 'dri dogs sel zhus/ go rim tsam yang bla ma'i bka' dang mi 'gal bar byas te bsgrigs pa yin ma gtogs/ rang blo rang gis tshad mar byas te bya ba sne gcig brtsams pa med cing bdag lta bus de 'dra byed ga la spobs gsungs te thugs nyams chung ba'i tshul mdzad/ de lta bus