[A:288]gtums pa de'ang rje mkhyen brtse'i zhabs la gzigs 'bul zhus pa yin ces grags/ de nas bzung ste dang po chos sbyin mi zad pa'i sgo 'phar 'byed pa dang / bar du sgrub pa nyams bzhes kyi thugs kyi bum bzang bsti ba dang / tha mal skal ldan gyi snod du spel ba'i skabs rnams su bgegs dang bar chad kyi glags blta ba dang skabs tshol ba'i gnas 'di dang 'di'o zhes brjod rgyu yod pa sne gcig ma byung bas na lkog gyur thams cad mkhyen pa zhig yin pa'i nges shes yang yang skyes so zhes cha rgyus yod pa 'dris yun ring ba dag gis gcam bu min par brjod cing / de tsam du ma zad rang gzhan bu slob rnams kyi shes rig gi byed pa chos su 'gro ba dang mi 'gro ba'i khyad dang / lkog tu dge sbyor la brtson pa dang mi rtson pa'i khyad dang lab brjod bzang ngan ci byed rnams kyang sgrib thogs med pa mkhyen tshul gsal bar gsungs pa'ang rang gzhan kun la mthong thos su gyur pa mang ngo / /me phag lor skye rgu don grub gling du sgrub thabs rin po che kun las btus pa'i tshes char phabs/ de nas rgyud sde rab 'byams kyi chos kyi phung po de nyid rgyun chad med pa 'dod 'jo'i bum pa bzang po lta bu par du 'god pa'i ched du/ yig bris pa/ lha ris pa/ zhu dag mkhan/ shing bzo ba/ par brkos bcas las byed brgya phrag gcig las lhag tsam bsags nas zla ba drug gi phog chas tshul bzhin sprod de/ hor zla gsum pa nas brgyad pa'i mjug gi bar du las su bcol te gla rngan dpa' dar gsol ras kyis mgu bar byas nas rang gnas su gtong ba/ de 'dra lo ngo drug gi bar du mdzad