[A:299]nag dril gsum gyi sgrub tshul so sor rim bzhi rim lnga dang bcas pa/ yang snying nA ro ta pa'i lugs kyi rnal 'byor bcu gcig rdzogs rim dang bcas pa/ gnyis med kyi rgyud dpal dus kyi 'khor lo sbyor drug gi nyams len dang bcas pa/ snga 'gyur ba'i rgyud sde ma hA yo ga'i phyogs rdo rje phur pa/ a nu yo ga'i phyogs yang dag he ru ka /shang lugs rgyud sde lnga chig dril dang / sgrub thabs rin po chen kun las btus pa'i chos sde las/ tshe dang shes rab dang / dpal bskyed pa dang / nad gdon sdig sgrib zhi ba dang / gdul bya dbang du 'du ba'i skor gyi lhag pa'i lha mchog du ma'i bsnyen sgrub la rtse gcig tu brtson par mdzad/ de dag thams cad kyang bstan pa rin po che kho nar dgongs pa'i dbang gi 'bad rtsol chen po gnang ba ma gtogs rang don rang gces tsam las gzhan med pa dag gis de 'dra'i dka' tshegs ci zhig dgos/ zab dgu nyon la nyams len gcig tu dral/ /zhes pa lta bu ma mkhyen pa dang ma thon pa'ang ma lags shing / gnad gcig ma zin ca co mang pos bslus/ /zhes pa lta bu'i rigs can yang ma lags mod/ kun kyang bstan pa rgyas pa'i rgyu ru bsngos/ /zhes pa ltar/ phrin las rtsal sprugs kyis rgyal bstan dbang gi rgyal po gdul bya'i rgyal mtshan gyi rtse mor bskal pa nas bskal pa'i bar du brling ba'i thabs kyi khyad par gang dang gang mchis pa de dag la rnam pa gcig tu gzhol cing mtha' gcig tu 'dril bar mdzad do/ /rje nyid kyi bgrang gzhi zhe drug par/ kun mkhyen 'jam dbyangs