[A:309]gtsang khams gsum nas rgyal sras nor bzang gi brtul zhugs bzung ste btsal ba'i dam pa'i chos kyi snying po sgrub thabs rin po che kun nas btus pa'i 'phros lus gang yod pa thams cad rje de nyid kyi dgongs bzhed ltar chog sgrig mdzad de zhal skong gnang / lcags byi lo 'di nas bzung ste rgyal bka' rin po che gangs can skad du 'gyur ro cog gi bklag lung tshar bdun tsam gyis mthun rkyen phun sum tshogs par bsgrubs/ bya rgyud de bzhin gshegs pa'i rigs kyi rgyud las gsungs pa ltar gyi mchod rten grangs mang gsar du bskrun/ rnying pa grangs mang zhig gsos mdzad de sangs rgyas kyi bstan pa dar ba dang / sems can gyi bde skyid 'phel ba dang / nag phyogs kla klo'i sna 'dren bsdong zla dang bcas pa'i 'tshubs 'gyur zhi ba'i thugs smon yang nas yang du mdzad/ gzhan dag la'ang de ltar bgyid dgos pa'i bka' bkod gnang / bgrang bya nga lnga pa lcags glang lor/ rgyud sde rab 'byams rgya mtsho'i smin grol chos kyi 'khor lo gsum pa bskor/ rje nyid kyi slob ma'i thu bo li thang be tshong chos rje mkhyen rab rgya mtsho zhes/ rgyud sde bzhi'i bsnyen sgrub mthar phyin/ lhag pa'i lha 'jam pa'i dbyangs kyi byin rlabs mtshan ma brnyes pa'i rdo rje 'dzin pa chen po de nyid grogs su bcol/ des kyang dbang bka' mang zhig gis zhabs 'degs zhus pa'i skabs kyi 'khor gyi gtso bo kaHthog rdo rje gdan gyi chos smra ba ma hA paNDi ta si tu chos kyi rgya mtsho dang / zab rgyas chos kyi spyan yangs rig pa smra ba 'jam dbyangs mkhyen rab mtha' yas dang bdag cag 'dus pa bcu phrag