[A:243]sgo gsum rnam par 'byed pa las/ /rnam par grol ba'i rol gar rnam par rtse/ /dang po skye ba'i cho 'phrul bstan pa'i yul ni/ gling gi mchog lho gling las kyi sa pa/ de las gdul bya dang 'dul byed khyad par can gyi zhing sa bsil ldan ljongs kyi bye brag gtsang phyogs nyang smad sa'i thig le bsam 'grub rtse'i nye 'dabs dge mtshan du mas brgyan pa'i gnas su/ rigs kyi mchog rgyal rigs te mi nyag si'u rgyal po'i gdung rigs/ rus ma bslad par 'ga' thar phyogs su sman gyi ljon pa lta bu'i dam pa mang po dang / de nas ri bo dge ldan pa'i bstan pa'i rgyan du gyur pa 'ga' zhig dbus su byon pa dang / gtsang phyogs su ngor e waM pa'i mkhan chen yongs 'dzin paNDi ta zhes pa yi dam lha'i zhal lung thob/ yum stong phrag brgya pa'i tshig don mtha' dag thugs la mnga' ba de dang / dpon slob nam mkha' rgyal mtshan ces pa byang chub kyi sems 'byongs pa'i dge ba'i bshes gnyen de dag gi sku dbon no/ /yab ni mkhan chen dam pa'i sku mched rab dkar skar ma pa sangs lta bu la 'dod 'byung nor bu lta bu'i lhag bsam dang ldan pas ming don mthun pa/ yum ni mtho ris kyi yon tan dang 'di phyi skyid pa'i chos ldan gyi don dang mtshungs pa'i ming can gnyis kyi sras su btsas so/ /dus ni dbang thang dang bstun pa'i brda me mo lug gi lor smal po zla ba'i dus tshes dge bar/ nam mkha'i nor bu gshin rje'i phyogs nas ldog pa'i dus gyi thog mar/ shar ri'i phrag pa nas 'dzin ma'i khyon la dang po gzigs pa'i tshe 'jig rten gyi mig tu 'khrungs so/ /de'i tshe legs bris dbang po dang gdeng can bdag po