[A:321]nos/ mtshungs med mi pham chos rje la rgyud 'grel pa dang bcas pa'i gsal byed 'bri ba yang yang bka' nan lci bas bskul ba'i 'grel chen padma dkar po'i dgongs rgyan 'khor 'das de nyid ston pa'i sgron me rab tu gsal ba zhes bsngags brjod kyi mchod sprin stobs pa'i yul du gyur pa de'i khrid lung nyin grangs yar zla'i grangs la mdzad/ rab shis mi rje'i gdung sras 'jam dbyangs lung rigs seng ge zhes mkhas btsun bzang po'i dpal gyis mngon par mtho ba de nyid 'khor slob dang bcas pa la/ rje btsun rdo rje btsun mo'i byin rlabs zab khrid yan lag dang bcas pa dang / thugs bzhed gang mnga' ba thams cad skong / de skabs kyi mkhas btsun dge ba'i bshes gnyen gang byon thams cad la bstan pa'i don yal bar mi 'dor ba ci nus gang lcog sgrub dgos pa'i bka' nan gser gyi gnya' shing ltar lci ba gnang / sngar gshegs pa'i bla ma dam pa rnams 'od gsal dag pa'i snang ngor yang yang mjal zhing / khyad par kun mkhyen 'jam dbyangs bla ma'i ye shes kyi skus rjes su bzung ba dang zung 'jug phyag rgya chen po'i rtogs pa mngon du gyur pa mkhan chen bkra shis 'od zer dgongs pa rdzogs pa'i skabs su'ang dag pa'i sgyu lus mngon sum byon nas yun ring tsam bzhugs pa dang gsung gleng mdzad ces gsungs/ phyir mi ldog pa'i rgyal sras sems dpa' chen po thub bstan chos kyi grags pa zhing khams brjes pa'i skabs su'ang dag pa'i snang char 'gag pa med pa shar nas gsung gleng