[A:༣༤༨]བླག་འགྲུབ་གྱུར་ཅིག ༥ །རང་དོན་སྤངས་དང་རྟོགས་པ་མཐར་ཕྱིན་ནས། །གཞན་དོན་བསྡུ་དངོས་བཞི་ཡི་ཕྲིན་ལས་ཀྱིས། །ཀུན་གསལ་སྒེག་མོའི་ཕ་མཐའི་རྗེས་ཞུགས་པའི། །འགྲོ་རྣམས་ཕན་བདེའི་ལམ་ལ་འགོད་གྱུར་ཅིག ༦ །མདོར་ན་བསྟན་དང་འགྲོ་བའི་དོན་གྱི་ཕྱིར། །ཟབ་ལམ་སྒྲུབ་པའི་འབྲས་བུ་མངོན་གྱུར་ནས། །ཕྱི་ནང་གསང་བའི་བདུད་སྡེ་དཔུང་བཅས་ཀྱི། །ཉེར་འཚེ་ཀུན་ལས་རྟག་པར་ཛ་ཡནྟུ། ༧།ཞེས་དམ་བཅའ་མཛད་ནས། དེ་ཡང་ཐོག་མར་བླ་མ་བརྒྱུད་པའི་རྣམ་ཐར་བསམ་ཞིང་གསོལ་འདེབས་བགྱིད་དགོས་པ་ལ། རྣམ་ཐར་ཐམས་ཅད་ཡིད་ལ་དྲན་བཞིན་པའི་སྒོ་ནས་འཇམ་དབྱངས་བླ་མ་ལ་རྩ་བརྒྱུད་ཀྱི་བླ་མ་སོགས་སྐྱབས་གནས་མ་ལུས་པ་འདུས་པར་མོས་ནས་ཤེས་བྱ་མ་འདོན་བཞིན་པས་ཕྱག་འབུམ་ཕྲག་བཅུ་ཕུལ། དེ་ནས་རིམ་བཞིན་སྣང་གསུམ་གྱི་ལམ་རྣམས་བསྒོམ་པའི་ཚུལ་བགྱིས་ཤིང༌། ཐུན་མཚམས་རྣམས་སུ་ཕྱག་སོགས་ཚོགས་བསགས་སྒྲིབ་སྦྱོང་ལ་བརྩོན་པར་བགྱིས། དམིགས་རྐང་རྣམས་ཀྱི་ནང་ནས་ལས་དང་པོ་པ་ལ་མི་རྟག་པ་བསྒོམ་པ་འདི་གལ་ཤིན་ཏུ་ཆེ་བར་འདུག་གསུངས་པ་ལྟར་མི་རྟག་པ་ཟླ་བ་བཅུ་གསུམ་ལ་བསྒོམ། དམིགས་ཐུན་གཞན་རྣམས་ཆད་ལུས་མེད་པར་བསྒོམས་པས་ལོ་ཧྲིལ་པོ་གསུམ་སོང༌། སྣང་གསུམ་དམིགས་ཞོར་དུ་སྐྱབས་འགྲོ་འབུམ་ཐེར་ཉེར་གསུམ་སོང༌། བྱང་ཆུབ་ཀྱི་སེམས་བསྒོམ་སྐབས་ངེད་ཀྱི་གཅུང་ལེགས་འཛིན་ལ། གྲོང་འགོ་ཚང་གི་བུ་དབང་སྟོབས་ཀྱིས་གྲི་བརྒྱབ་པ་ཐོས་ཚེ། དང་པོ་སེམས་ལ་མི་དགའ་བ་ཆེན་པོ་བྱུང༌། དེ་ནས་བདག་