[A:༣༦༡]པ་དང༌། རྗེ་བཙུན་མི་ལ་སོགས་སྔོན་གྱི་སྐྱེས་ཆེན་དམ་པ་རྣམས་ཀྱིས་དཀའ་སྤྱད་མཛད་པ་ལ་བསམས་ནས་ལུས་སྲོག་ཡལ་བར་འདོར་བའི་སྙིང་རུས་བསྐྱེད་ནས་ཕྱག་དང་མཎྜལ་འབུལ་བ་སོགས་སྡུག་བསྔལ་ཐམས་ཅད་དང་དུ་བླངས་ཏེ་བཟོད་སྲན་བསྐྱེད་པས། ལུས་ཀྱི་ཡན་ལག་ཕལ་ཆེར་གྱི་པགས་པ་བརྡོལ་ནས་རྨར་སོང་བ་དང༌། ལུས་ཀྱི་ཉམས་ཤིན་ཏུ་ཞན་པ་གྱུར་པས། ཨ་མ་བུག་སྒོར་ཟས་སྐྱེལ་དུ་ཕྱིན་པ་ན་ང་མཐོང་བའི་ཚེ་མི་བཟོད་པར་ངུ་བ་དང༌། ང་རང་གིས་ཀྱང་ཤིན་ཏུ་བཟོད་དཀའ་བར་གྱུར་པའི་ཚེ། གྲུབ་ཐོབ་བྱམས་བསྟན་གྱིས་ལྟུང་བཤགས་འབུམ་ཐེརདང་སྦྲགས་ནས་ཕྱག་འབུལ་དུས་ཀྱི་རྣམ་ཐར་ལྟར། ངན་སོང་གསུམ་གྱི་སྡུག་བསྔལ་དེར་སྐྱེས་པའི་སེམས་ཅན་རྣམས་ཀྱིས་དོན་ཅིའང་མེད་པར་མྱོང་དགོས་ན། ངས་སེམས་ཅན་ཐམས་ཅད་ཀྱི་དོན་དུ་འདི་ཅིས་ཕྱིར་མི་བཟོད་སྙམ་དུ་བློ་སྦྱངས་པ་དང༌། སྡུག་བསྔལ་འདི་དག་རང་སེམས་ཀྱི་འཁྲུལ་སྣང་ཡིན། སེམས་ཀྱི་ངོ་བོར་ཅི་ཡང་མ་གྲུབ་པས་ལྟ་བ་འཁོར་འདས་དབྱེར་མེད་ཀྱི་ཀློང་ན་སྡུག་བསྔལ་གྱི་མིང་ཡང་མེད་པར་ཤེས་པས་ལྟ་བའི་ངང་བསྐྱངས། ཚེ་གཅིག་གིས་སངས་རྒྱས་བསྒྲུབ་པ་ལ། སྙན་བརྒྱུད་ཚད་མ་བཞི་ལྡན་གྱི་གདམས་ངག་གསུང་ངག་ལམ་འབྲས་ལྟ་བུ་དགོས་པར་གོ་སྟེ། དེའི་མན་ངག་གི་གནད་ཟབ་མོ་རྣམས་དྲི་བའི་ཡུལ་མ་རྙེད་ནས། རྒྱལ་བ་ཐམས་ཅད་ཀྱི་ཡེ་ཤེས་ཀྱི་རང་གཟུགས་འཇམ་དབྱངས་ས་སྐྱ་པཎྜི་ཏ་ཆེན་པོ་དང་རྩ་བའི་བླ་མ་ངོ་བོ་དབྱེར་མེད་དུ་མོས་ནས་གསོལ་བ་ཡུན་རིང་དུ་