[A:༣༦༤]ཤེས་པའི་ལྟ་བས་རྒྱས་བཏབ་སྟེ་སྦྱངས། གཞན་ཡང་སྒྱུ་ལུས་འོད་གསལ་རྨི་ལམ་རྣམས་ཀྱང་ལེགས་པར་གོམས་པར་བྱས་ཤིང༌། སྤྱོད་པ་ཐམས་ཅད་དོགས་མཐར་བཟུང་ནས་གང་ལའང་རྩིང་སྤྱོད་དུ་མ་ཤོར་བ་བགྱིས། དེ་ལྟར་ཡུན་བསྲིངས་ནས་ཉམས་སུ་བླངས་པས། ལྷ་དང་བླ་མའི་ཐུགས་རྗེས་ལྟ་ཐོག་ཏུ་སྒོམ་པ་འཁྱོལ་ནས་ཟབ་མོ་ནང་གི་རྟེན་འབྲེལ་ལ་ཡིད་ཆེས་ཀྱི་ངེས་པ་གཏིང་ནས་སྐྱེས། དེ་ནས་བདག་མདུན་སོ་སོར་དབྱེ་ནས་བསྒོམ་རྒྱུ་མེད་པ་ལྟ་བུར་གྱུར་ཏེ། སྣང་སེམས་འདྲེས་ནས་གཟུང་འཛིན་གྱི་སྒྲིབ་གཡོག་དང་བྲལ་ཏེ། རིག་སྟོང་གཉིས་སུ་མེད་པའི་ཡེ་ཤེས་ཀྱི་ངང་ལ་གནས་པ་ཞིག་བྱུང་ཡང་རྒྱུན་བརྟན་པ་ཞིག་མ་བྱུང་བས་སྙིང་པོ་ཆེར་མི་འདུག །འོན་ཀྱང་སྙན་བརྒྱུད་བཞི་ལྡན་གྱི་ཚུལ་དུ་ལམ་འདི་ལ་ཡུན་རིང་དུ་གོམས་པས། འཁོར་འདས་དབྱེར་མེད་ཀྱི་ལྟ་བ་ཇི་ལྟ་བ་བཞིན་ངོ་འཕྲོད་དེ། ད་ལྟ་ནི་སྦྱང་གཞི་སྦྱོང་བྱེད་སྦྱར་ཏེ་གཞི་ལམ་འབྲས་གསུམ་བསྲེས་ནས་བསྒོམ་པའི་ཚེ་རྣམ་རྟོག་གིས་སྒྲོ་བཏགས་ནས་མཚོན་ཆོས་བསྒྲིགས་པ་ཙམ་མ་ཡིན་པར། གདོད་ནས་སྐུ་དང་ཡེ་ཤེས་ཡིན་པ་ལ་ཡིན་པར་ངོ་ཤེས་པ་ལྟ་བུའི་ངེས་པ་རྙེད་ནས། ལམ་དུས་ཚིག་མྱུར་བུལ་ཇི་ལྟར་བྱས་ནས་བཏོན་ཀྱང་རུང༌། སྲུང་འཁོར་བསྒོམ་པའི་ཚེ་བདུད་བཞི་དབྱིངས་སུ་གཅིག་ཆར་དུ་ཆོད་པ་དང༌། གཞལ་ཡས་ཁང་གིས་ལམ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མཚོན་ཚུལ་ཡང་རིག་པ་སྐད་ཅིག་མའི་སྟེང་དུ་ཚང་བར་ཤེས་ཤིང༌། དེ་དང་ཁ་དོག་འཁོར་འདས་དབྱེར་མེད་ཀྱང་དུས་རིམ་ཅན་དུ་མི་