[A:༣༦༣]གསལ་བ་དང་ང་རྒྱལ་བརྟན་པ་གཉིས་ལས་ཕྱི་མ་གཙོ་ཆེ་བ་འདུག་སྟེ་ང་རྒྱལ་བརྟན་ན་རྣམ་པ་རང་ཤུགས་ཀྱིས་གསལ་ཡོང་བ་འདུག །དེ་ནས་རྟེན་དང་བརྟེན་པར་བཅས་པ་ལ་གསལ་སྣང་ལེགས་པོ་ཞིག་བྱུང་ཚེ་སླར་ཡང་མི་གསལ་བ་ཞིག་རེད་སོང༌། དེའི་དུས་སུ་གསལ་མི་གསལ་སྙམ་པ་རྣམ་རྟོག་ཡིན། ལྟ་བའི་ཀློང་ནས་གསལ་མི་གསལ་མེད་པར་ཤེས་པས་ལྟ་སྒོམ་བསྲེས་ནས་བསྒོམས་པས་རགས་པའི་བསྐྱེད་རིམ་ཤིན་ཏུ་བརྟན་པར་གྱུར། ལུགས་འདི་ལ་དབང་བཞིའི་ལམ་སོ་སོར་རིམ་བཞིན་བསྒོམ་པ་དང༌། བུམ་དབང་གི་ལམ་གྱི་ནང་དུ་དབང་གོང་མ་རྣམས་ཀྱི་ཟབ་གནད་ཐམས་ཅད་དྲིལ་ནས་བསྒོམ་པའི་ཚུལ་གཉིས་ལས། ཕྱི་མ་ལྟར་མངོན་བྱང་གི་སྐབས་ལྟ་བུར་མཚོན་ན་སྦྱང་གཞི་ལྔ་ཚན་བཅོ་ལྔ་པོ་ཐམས་ཅད་སྦྱར་ནས་བསྒོམ་པ་དང༌། ལུས་དཀྱིལ་གྱི་ཉམས་ལེན་ཡང༌། ལམ་འབྲས་ཀྱི་གདམས་པ་ཡོངས་རྫོགས་ཀྱི་གནད་བསྡུས་པར་གོ་ནས། བསྐྱེད་རྫོགས་ཟུང་འཇུག་གི་ཚུལ་དུ་ཉམས་སུ་བླངས་པས། དེ་ནས་ཕྲ་བའི་བསྐྱེད་རིམ་ཡང་བརྟན་པར་གྱུར་ཏེ། སྤྱིར་ལྷ་ཐམས་ཅད་གསལ་ཞིང་ཁྱད་པར་དུ་མགྲིན་པ་དང་གསང་གནས་གཉིས་སུ་གཙོ་བོ་ནས་འབྲུ་ཙམ་དང༌། འཁོར་ཡུངས་འབྲུ་ཙམ་རེ་བསྒོམ་ཚེ་ལྷ་དེ་རྣམས་ཀྱི་སྤྱན་དཀར་ནག་ཚུན་མ་འདྲེས་ཤིང༌། དབུ་སྐྲ་ཉག་མ་རེ་རེ་བཞིན་མ་འཛིང་པ། རུས་རྒྱན་ཡང་སྲད་བུ་དམར་པོ་ལ་མུ་ཏིག་བརྒྱུས་པ་ལྟར་བཀྲ་ལམ་མེ་མཐོང་བ་ཞིག་མ་བྱུང་གི་བར་དུ་བསྒོམས། དེ་ཡང་དང་པོར་ཁབ་མིག་ཏུ་ལྷ་སྐུ་མི་ལུས་ཙམ་བསྒོམས་ནས་ཡང་དོགས་ཀྱི་འཛིན་པ་བྱུང་ཚེ་ཆོས་ཐམས་ཅད་རྫུན་པར་